重有個多月就到聖誕節，係零售業嘅黃金檔期，由於今年市道唔好，商場大業主要更落力做宣傳推廣。地鐵旗下商場就各有唔同嘅主題迎接聖誕節，其中九龍灣德福廣場可以用金光璀璨嚟形容。
德福廣場用咗二十萬粒水晶、24K真金燈飾、十呎高水晶聖誕樹，用一萬多個燈泡布置。聽講其中十九盞燈飾總重量逾四千磅。水晶聖誕樹要用八個人花二十日先搞掂。
另外，青衣城就變成歌劇院，入口有巨型拱門，巴洛克雕像，重有巨型水晶燈同真金金箔聖誕藤，都係要令人有金光耀眼嘅感覺。兩個場嘅布置禮拜六會搞掂，至於用咗幾多錢，有關方面就冇透露，睇嚟都唔嘢少。
咁嚟到買嘢梗係有優惠啦，中獎可獲得賓士名車。而購物滿一定金額可以優惠價換禮品。想做善事嘅就換購水晶禮品，善款會捐畀腦科中心基金。
喺𠵱家經濟環境咁差嘅情況下，趁假期行吓商場睇吓靚嘢，暫時忘記工作同生活嘅壓迫，心情都會好啲。
各代理為帝后華庭開鑼花心思搞宣傳，利嘉閣昨日租用中環Queen'sClub作誓師場地，高層重粉墨登場扮皇帝、皇后及金牌代理，做短劇畀傳媒同發展商睇，亦希望以輕鬆嘅手法，提高員工士氣，認真用心良苦。
扮皇帝嘅係寶翠園分行經理顧偉瀚，皇后係般咸道分行經理李妙芬。兩位着上清朝戲服，扮演為愛子揀學校頭痛嘅皇帝同皇后，巧遇派樓盤傳單嘅堅道分行經理柯樽標，經佢一輪介紹，皇帝同皇后決定遷居，樓盤就因為兩人遷入命名帝后華庭。
廖創興企業嘅九肚山新盤皓朗山莊，銷情後勁不繼，發展商惟有出絕招，將佣金加到2.5%，再送價值十萬蚊嘅鑽石勞力士手表。結果美聯深井分行StephenWong跨區跑出，傾掂間三十三號屋，成交價1350萬，佣金連名表總值接近二十四萬。
長實貨尾盤九龍塘翰林軒亦唔輸蝕，市傳佣金高達樓價5%，以五百萬一個單位計，淨係佣金都成二十五萬。各代理要努力嘞！
本報地產版除報道新聞之外，亦有副刊介紹本港同內地樓盤等，盤源好多嚟自地產代理，間唔中都收到讀者來電，自薦單位，報館嘅立場只要啱嘅無任歡迎，一定會安排報道。最近收到讀者黎女士嘅傳真，想推介佢嘅夏蕙臺單位，但就冇聯絡方法。在此請黎女士補付聯絡方法，等同事可以跟進。
本港中區商廈大業主置地集團，喺新加坡Marina區嘅商廈OneRafflesLink（圖三），最近攞到美國UrbanLandInstitute2002年度卓越大獎（大型寫字樓組別）。
獎項分十個組別，由十三位來自美國建築及城市規劃界精英組成嘅評審團，喺105項參賽作品中，按財務可能性、土地使用效益、建築設計，社會及環境配合程度等準則選出得獎作品。
OneRafflesLink就以提供特大樓面、最先進節約能源科技、地下商場，同連接地鐵、會議中心及演藝中心等因素而獲獎。
「一處地方，一種感覺。有些像小說般鋪張，有些像散文般寫意，有些像詩一樣醉人」。睇完之後係咪感染到啲詩般情懷呢？呢個係西半山寶珊道1號邀請函嘅前半段，下文係「寶珊道1號的氣質又如何？回答這個問題，還要閣下親臨一趟」。
佢哋重引埋大文豪莎士比亞嘅一句話「Ilikethisplaceandwillinglycouldwastemytimeinit」。邀請函面貼上羽毛（圖四），唔知係咪襯番用嚟寫莎翁句話呢？
寶珊道1號發展商新地等，今日喺現樓舉辦寶珊庭園敍，節目係「池畔古典樂演奏、庭園法式美食薈」。總之就要營造高尚嘅生活品味啦。
蘭西記得上次新地賣跑馬地禮頓山時，就搞過一個跳舞表演，連郭公子都有到場。
上禮拜五至今個禮拜一喺尖沙嘴舉行嘅「2002深圳靚盤至抵SHOW」，搞手中原（中國）李勁峰話，四日超過五千人參觀，電話查詢就超過一千個，結果做成差唔多一百宗成交。
中原（中國）重即場做咗個問卷調查，成功訪問435個到場參觀人士，近四成覺得，展銷方式可一次過收集內地樓盤資訊。六成認為，同一地區或同一城市嘅樓盤一起做聯展就最理想嘞。
蘭西
電郵地址：