財政部長項懷誠連續曝光咗兩日，噚日傳媒焦點落喺另一京官中國證監會主席周小川身上。
周主席噚日現身世界會計師大會，先去巡吓展覽場館，當然唔少得中國館，八方問佢「北水南調」幾時成事，佢話三言兩語講唔清楚，所以約定八方星期四上晝佢演講完之後再慢慢傾。
八方再問佢查史美倫係咪會「回歸」香港證監會，周主席答得幾有意思：「沒聽說她要回去（香港），我們也不放（人）。」當年國務院總理朱鎔基親自提出要以香港待遇聘請香港專家做財金官員，查太即成最高級嘅港人京官，不過佢只係象徵式收三千蚊，其餘幾百萬捐晒去訓練中國證監人才，咁抵用又咁好用嘅人才，我係周主席都唔放人。
至於盛傳周小川明年三月會接替戴相龍做中國人民銀行行長，周主席答得重妙：「我以前是人行副行長。」八方惟有等到星期四再問。
（圖）中國證監會主席周小川（右）噚日喺世界會計師大會上成為傳媒焦點。
傳真︰2623-9278
電郵︰