前亞姐羅麗莎（Losa）自從同何伯後人何柱國交往之後，身家同行頭都升價唔少，重頻頻有新搞作。早排Losa投資百萬開家具店，噚日佢又到尖沙嘴為擎天半島二期記招宣傳，重宣布名下家具店TheLivingConcept攞到樓盤獨家裝修代理權。
噚日Losa一改平日雍容富泰嘅打扮，以專業人士look現身，佢一身純白MaxMara套裝，右手中指重戴咗Chanel鑽戒，佢話今次個project係發展商主動提出，傾咗兩、三個禮拜就成事。Losa話：「上年我買咗一期三座一個一千呎四百幾萬單位，覺得風水好好，會裝修做示範單位再租出。𠵱家我又睇中二期平台，如果四千五百元一呎都會再買多一個千五呎單位。」泊到大碼頭，真係講嘢都豪氣啲！
Losa又大談心目中嘅理想安樂窩，佢話：「每個屋企都要舒服，一返屋企就冇煩惱，我自己一個人住，屋企都係以素色為主，平日都會煎吓牛扒食。」記者問Losa何生幾時先會成為男主人，佢即話：「私人嘢唔講喇！」
陳雅倫最近有部新戲就快上畫，但係今次就唔係以性感做賣點，噚日佢喺尖沙嘴一個飯局入面話：「我唔抗拒性感，但係我唔想淨係性感。」
今次陳雅倫做一個賣魚妹，重同一班後生仔女合作，佢覺得係一個新突破！除咗呢個突破之外，佢重話因為呢部戲，佢第一次去街市喎！
車淑梅嘅爸爸車仁佳，上月喺美國三藩市因心臟病發逝世，噚日就喺沙田寶福紀念館出殯，車淑梅同丈夫及家人一早到現場打點，不過整個儀式就謝絕記者採訪。車淑梅同家人都十分傷心，不時用紙巾抹眼淚，其後遺體安葬喺將軍澳華人永遠墳場。之前有報道話車淑梅嘅爸爸終年七十六歲，其實車父報大三年，實際年齡係七十三歲。
張學友早排喺台灣為東風電視台錄影節目，佢同主持陶晶瑩（陶子）去陽明山比試廚藝。由於學友平日甚少入廚房，所以陶子提議佢炒高麗菜，因為比較簡單。點知學友入廚房一見到猛烈嘅爐火，即時嚇到四處閃避，後來喺廚師嘅幫忙下，手忙腳亂嘅學友先至能夠完成呢道菜。
吳彥祖早前以隊長嘅身份，帶領MissionMini香港隊參加來自全球十七個國家嘅missionmini汽車比賽，佢同隊員一連兩日不停作賽，揸住部MiniCooperS喺西班牙巴塞隆拿嘅大街小巷中穿梭，最終香港隊獲得第三名。