孫九招救樓市，孫局長由星期三至星期六日日出鏡，乜都講晒。呢位局長外號孫公，果然係老薑，無論上電台、電視，面對記者，對答如流，可以講就猛講，扯到上特首、政治，就大耍太極，講咗等於冇講，想話扯佢辮子，難咯。佢嘅手下梁展文（掌管房屋署）就差一皮咯，俾鄭大班喺電話中窒足一個鐘頭，無還手之力，有人話梁展文平時好醒嘅噃，點解上星期四嘅表現咁失常呢？唔通佢唔熟悉香港房地產？
孫九招嘅背後假設係通縮嚴重由樓市造成，董特首對記者講：「根據經濟學家分析，五成至六成香港現在的通縮是源於房地產價格和房地產的滑落。為了打破這個惡性循環，政府決定採取果斷措施，穩定樓市。」董特首冇提到這個經濟學家，新城財經台問孫明揚呢個問題，佢避而不答，只係話特首見過幾位經濟學家，其中一位係港大王于漸教授。
L教授聽咗就同左丁山講：「喂，王于漸係芝加哥大學產品，應該相信貨幣數量學說（QuantityTheoryofMoney）啫，通脹通縮都係貨幣供應改變嘅現象，唔係甚麼costpush（成本推動），與樓價下跌無關。我唔信王于漸咁水皮，會話畀特首聽，通縮係樓價滑落造成嘅噃，記者應該搵王于漸澄清，還佢清白。」L教授與林行止都認為政府倒果為因，樓價跌乃通縮嘅結果並非通縮嘅成因。L教授好有興趣知道特首同邊幾位經濟學家傾過，俾人誤導！叻嘅記者，快啲去搵王于漸問吓。