美股周一晚高開，趙飛雲興奮咗一陣，但納指升至1425已回頭，8月頂部1426第5次試闖失敗，最後跌17點，收1393。杜指走勢亦係先升後跌，尾市跌幅擴大至92點，雖仍守住20日線（現處8484）之上收市，但對MACD走勢不利。
美股好友雖仍佔上風，但杜指8750，納指1426若不盡快攻破，恐怕會輪到淡友反攻。
港股噚日未有受美股拖累，恒指先跌後升，收9965，升44點。雖然只是區區44點，但反映好友仍控制大局，等候好消息進一步突破。短期而言，小雙底頸線9880成為好淡分水嶺，只要不確認跌破，倉內恒指Call輪9552，仍可繼續持有，上望10200至10400。
上星期有大行老友約飲茶，閒談中曾叫趙飛雲留意吓隻意科控股（943），之後睇咗兩日冇動靜就冇再理，本周一股價突然彈升，跟住噚日停埋牌。趙飛雲八卦打電話問老友原因，佢話意科發行總值3800萬元新股（每股作價0.225元，較停牌前0.177元有溢價27.1%），買入文傳（343）中文2000軟件系統51%，呢件產品目前已經有錢賺。中文2000可以行Linux平台，由於內地大力支持Linux軟件，發展潛力好大，據講重可以用於手機及PDA，前景秀麗。
老友重話，自從意科新大股東入局後，銳意整頓業務，加強公司盈利能力，今次只係第一步。隻股復牌後如果唔係高開太多，可以小注炒番轉。
趙飛雲