香港跳水運動員俞越同李穎詩合著嘅新書：《摘金背後──十個運動員的成長故事》，其中一個受訪者係四年前去美國參賽意外受傷，下半身癱瘓嘅中國體操代表桑蘭。
噚日桑蘭出席新書發布會時一身粉紅，笑容燦爛，全場矚目，人人都爭住搵佢簽名。雖然由細就要接受刻苦訓練，又要面對突如其來嘅打擊，但桑蘭好堅強，同八方傾偈時不時流露可愛嘅少女情懷，話自己同普通女仔一樣，鍾意學吓化妝打扮，因為要上鏡做體育節目主持。講到嚟香港可以shopping更加興奮，原來小妮子重有一個秘密夢想，佢嘅偶像係蕭亞軒同張學友，夢想有朝一日可以上台表演唱歌。對於雙腳可唔可以再行得番，桑蘭好樂觀，話最緊要日日做物理治療，令肌肉唔好萎縮，日後一旦出現新嘅療法或藥物，就有強壯嘅肌肉好復原。
黃建通攝
傳真︰2623-9278
電郵︰