本田Fit（即港版Jazz）車系自面世以來，響東瀛及香港汽車市場上，在一眾同級車之中可謂技壓群雄，備受用家追捧；惟一台1.3i-DSI引擎較着重低轉扭力同慳油一面，表現略嫌未夠全面。有見及此，車廠早前追加有Fit1.5型號，除改換上一台1.5公升VTEC偈外，重大玩有7個波檔嘅MultiMaticS半自動波箱；有傳代理正計劃響明年引入香港，以鞏固Jazz嘅領導地位。究竟部車有幾正？不如今日就等我哋《車天車地》版嘅特派員，帶大家到日本睇睇啦！
特約記者、攝影：李勤
新車外觀跟原有Fit1.3版本相近，僅頭尾車燈略有修改，以及四輪改換上時款嘅14吋合金胎軨組合；再者，車尾掀背嘅Fit字樣，其中圓點改用上藍色配襯，會係新車較易識別嘅地方。
新車改換上一台1.5公升SOHC嘅直4VTEC偈，輸出有提升外，分布亦見平均，並非如早前一台1.3公升i-DSI偈較側重前、中後嘅表現而已。再者，車廠還為其加設有7個波檔同MultiMaticS半自動波箱，給人完全體驗出手波車嘅快感外，重有扭力分配平均，尾段仍有好演繹嘅引擎反應㗎！相信有唔少Jazz嘅Fans，都好似筆者咁期望佢來臨㗎！
相比下，打開車門所見，除改換上白底圓表組合，容易為人察覺外，三幅式真皮跑車軚環，兩旁增設有銀白+/-按鍵，有別一般設計，而兩邊門壁電鍍把手，予人高貴之感外，原廠一體化中控台配搭，不僅有原廠冷氣同CD音響座，重可以改換MD組合㖭！由於Fit車系用上本田最新GlobalSmallPlatform結構，油缸置於前排座墊下，因而令整幅地台可有低重心設計外，車廂高度更有同級至大嘅1280mm數值。其次，尾排可整幅放平收摺之餘，尾排座墊亦有拉高功用，以及存放較高身嘅物件呢！
賣相Cute又討好，除深受年輕用家追捧外，改換一台1.5公升VTEC偈，表現有前有後夠平均，匹配7前速半自動波箱，可有手波車嘅快感同尾段快放演繹呢！
引擎：1496cc直4SOHCVTEC
馬力：110ps/5800rpm
扭力：14.6kgm/4800rpm
傳動：7前速MultiMaticS半自動波，前輪驅動
懸掛：（前）柱式獨立
（後）扭力連桿
制動：（前）透氣碟
（後）鼓式（ABS）
輪胎：175/65R14
尺碼：3830×1675×1525mm
軸距：2450mm；車重：1040kg
平均耗油：18.4km/L
新車售價：約港幣12萬
若然想包裝一部既獨特富個性，又見跑意嘅小辣車的話，查實日本無限（Mugen）早有安排；有齊全車包圍、Racing鬼面罩、整流裙腳同尾翼，重有大口徑76.3mm尾喉同降低車身15mm嘅跑車懸掛，以及雪白奪目嘅15吋合金軨選擇㖭！
網址：
附屬本田車廠嘅Modulo，亦替Fit1.5追加版度身訂做有全車包圍、鬼面罩、兩邊車身裙腳同尾定翼，唔少得重有15吋跑車合金軨，除跑格鮮明外，亦見有個性同時尚感，更易為車迷所受落。
網址：
日本版本田Fit1.5新型號，除有正面抗衡嘅豐田ist1.5外，新近豐田車廠又推出一款WiLLCypha，正好以圓渾嘅造型同Cyber嘅聯網設施，抗衡Fit嘅修長賣相同7前速MultiMaticS波箱㗎！WiLLCypha既Cute又前衞嘅賣相，亦不難有年輕一派車迷嘅追捧㖭！
WiLLCypha小檔案
引擎：1496cc直4DOHC
馬力：105ps/6000rpm
扭力：14.1kgm/4200rpm
傳動：4前速自動波，恒式四驅
尺碼：3695×1675×1535mm
軸距：2370mm
車重：1090kg
網址：