喺醫學界甚有地位嘅港大醫學院外科學系講座教授范上達，噚日傍晚難得開騷講換肝，八方初頭聽到一哥曾蔭培都去聽，重擔心一哥有乜唔妥㖭。到咗開場時，先知擔心係多餘，范教授人面咁廣，佢發表論文時，點少得一班肝膽相照嘅朋友？朱鎔基總理訪港，曾一哥都抽到時間嚟咩？一哥叫八方唔使擔心，話一切保安工作已安排妥當，而佢同范教授好熟，當然要捧場。
席上嘉賓重包括前環境食物局局長任關佩英同大學教育資助委員會秘書長張寶德，當然唔少得港大校長徐立之啦。不過呢幾位見識廣博嘅大人物，一坐埋就俾設喺座位上嘅投票器（有時學生上堂時用嚟㩒掣答問題）難倒，唔知點用，於是范教授一於唔講醫住，教咗呢班「學生」點用投票器先。
范教授噚晚喺瑪麗醫院新教授樓嘅演講堂，發表一項新醫學研究，唔少醫學界人士，如醫管局主席梁智鴻、立法會醫學界代表勞永樂、港大醫學院院長林兆鑫都盛裝出席，連喺民調風波後辭職嘅港大前校長鄭耀宗都有嚟，加埋一大班醫學院學生同瑪麗醫院醫生，全場約四百個位幾乎爆滿！
傳真︰2623-9278
電郵︰