十五年的婚姻破裂，陳女士帶着三名年幼子女，開展新生活。為了幫補生計，她每晚任兼職清潔女工，奈何因收入有限，只勉強夠一家餬口，卻不足以應付其他開支。刻下四母子，因為欠租及無力繳付煤氣、電費帳單，正面臨被迫遷的命運，急待援手。
婚姻夢碎，並沒有為陳女士帶來太大的傷感，對她來說，反而是一種解脫。「其實近兩年，我哋夫妻感情都唔係咁好，我老公鍾意賭錢，鍾意同朋友返大陸玩，久而久之，欠落銀行唔少卡數，早排重不斷有電話打嚟追數，所以我希望同佢劃清界線之後，唔會再有人嚟騷擾我同幾個細路哥。」陳女士斬釘截鐵地說。
四十一歲的陳女士，育有三名現年分別十四歲、十二歲及十一歲的子女，經濟上一直依賴從事運輸業的丈夫，但自從兩個月前，夫妻正式分居之後，多年來在家相夫教子的她，也要重投社會，於晚間當清潔女工。
「自己冇學識，又冇工作經驗，真係好難搵工，𠵱家上晝就打理家頭細務，夜晚就去幫人倒垃圾，幫補吓屋企。」惟陳女士慨歎，由於收入微薄，每月也入不敷支，經常要借貸度日。
據陳女士出示給記者的糧單顯示，她每天的工資以時薪計算，五個半小時工作合計八十二元，三十天的收入僅為二千四百六十元。「𠵱家我哋幾仔乸，每個月就係靠呢二千幾蚊生活，我哋已經盡量慳，餐餐罐頭、青菜，但細路哥返學、搭車都要使費，根本份糧都唔夠，其他嘅就更加負擔唔到。」
在迫於無奈的情況下，陳女士日前已向社會福利署申領低收入綜援金，惟審核需時，未能解其燃眉之急。目前陳女士已欠下房屋署兩個月的租金，合共四千四百多元；另外，煤氣費、電費帳單亦逾期未繳。
陳女士歎道：「大人嘅事，我真係唔想影響到細路哥，但𠵱家租都冇得交，隨時俾房屋署封屋，到時連幾個仔女都要陪我瞓街囉！」
蘋果日報慈善基金了解陳女士的處境後，撥款六千，助她清還欠租及煤氣費、水費帳單。 捐款編號：C0744
暖流熱線
電話：29908688
傳真：23702192
電郵：
網址：