我大口羅拉最近發現，西班牙有隊叫辣茄汁（LasKetchup）嘅三姊妹組合崛起。辣茄汁首《Asereje》唔單止喺十八個國家，包括英國、意大利同澳洲等，打上流行榜No.1，就連中田英壽都喺自己嘅網頁度話係佢哋嘅fans，重推薦佢哋張唱片《HijasDelTomate》。
我大口羅拉睇咗辣茄汁個MV，覺得三姊妹真係好鬼騎呢。佢哋喺MV度簡直係將電視劇《沙灘拯救隊》嘅陽光、海灘、性感同埋日本慎吾媽媽式嘅幼稚儍舞混合埋一齊，但係都幾有睇頭！
原來三姝除咗喺MV度跳儍舞之外，喺近排嘅歐美籃球賽中，都興播佢哋首歌，啲觀眾都識得跟住跳㖭！而「辣茄汁」重辣到去日本，竟然喺一個禮拜內有超過五千人下載佢哋啲歌落手機當鈴聲音樂，認真巴閉！