新特蘭前晚大踢守勢波悶和利物浦，賽後英國《太陽報》就以Bunch of blankers（意譯半場球隊）寸新特蘭悶，話佢哋全場無射門、角球，應該入健力士紀錄大全喎。我求大俠就覺得《太陽報》太苛刻，點解唔調轉讚新特蘭守得好？人哋係無射門同角球，但就攞到一分，你吹佢唔脹。
我求大俠同波友一樣，淨係想場場波多入球，但現實係殘酷嘅，換轉你係新特蘭領隊，都唔會喺作客同利物浦鬥攻啩？踢守波有何出奇？連利物浦領隊侯利亞賽後都無彈新特蘭消極，重豎起手指公大讚對方防守好㖭。
我求大俠最開心係呢場波無乜爭議判決，因為同日貝迪斯對切爾達、韋斯咸對曼聯同埋AC米蘭對帕爾馬，都有偏幫主隊之嫌。新特蘭呢一分，其實真係唔易攞㗎。
前晚愛華頓龍門李察胡禮對布力般表現神勇，我求大俠第一時間就諗，阿仙奴當年唔重用佢真係嘥料。當然，「李察仔」離開阿仙奴都啱嘅，重記得無論曼寧加同佢響阿仙奴打得幾好，到施文一打得佢哋又坐番冷板，唔走就笨。講開又講，𠵱家沙賓響阿仙奴踢得咁好，希望領隊雲格唔會等施文一出番，又掟沙賓落後備嘞。
富咸前鋒馬列喺星期日英超聯作客伯明翰時被逐離場，話說馬列畀主隊沙維治踢到飛起之後，即刻起身兜腳踢番沙維治，點知俾球證睇到！本來七情上面，喺地下典緊嘅沙維治聽到雞聲之後，即刻笑笑口好似奸計得手咁行開。其實呢條友上季踢緊李斯特城，對打比郡時就因為咁樣博到個十二碼，畀打比郡球員追住喊打咁滯，球證咪咁易上當呀！
NBA球星奧尼爾噚日「事先聲明」，話如果76人教練布朗真係大熱勝出做咗○四年美國奧運籃球隊教頭，佢就肯定唔會入隊，除非係積遜教練當選先至會「畀面」參加。我求大俠對奧尼爾呢番話好反感，如果佢有誠意同國家出力，就唔好多多條件，若果冇誠意，就唔該唔好咁多聲氣啦！唔該！
「少林寺」南華上個禮拜喺亞冠聯主場吞咗日本清水脈搏五蛋，好多球迷都奇怪點解場波會突然唔用鍾皓賢而用蕭國基守龍門。我求大俠收到風，原來係南華最高領導落「柯打」話點都要用蕭國基；但而我求大俠就覺得，球會高層又冇睇練波，比賽前又要話出邊個球員，完全係搞亂球隊，唔知今晚南華對流浪場榜首大戰又出邊個呢?