由於大陸手機特別好賣，所以早排一眾外資大行紛紛推介TCL國際（1070），在到達目標價2.50元後，外資大行再次調高目標至3元。
TCL上周公布第3季業績後，股價一條氣咁衝上去2.60元，噚日就稍為回順，但都守住2.45元收市。
據班分析員講，雖然TCL嘅白色家電非常唔掂，但手機利潤則好到不得了。呢排民企股造數事件，搞到成個證券界對任何賺大錢嘅內地公司都抱有戒心，但據講TCL就抬埋個核數師出嚟，堅稱自己盤數已經被審核，財政十分健康。
證券界永遠係跟紅頂白，跟住外資大行行事，雖然未必可以食到大茶飯，但短線嚟講，點都可以執到一茶兩飯，TCL不妨留意吓。
另外，小初上周提過嘅環球動力（231），股份近日停牌。據路邊社消息，間公司冇乜問題，主要係監管機構覺得隻股升得太勁，所以循例要解釋一番。
慕容小初