呢排啲特區官員道行突飛猛進，唔係講佢哋嘅能力，而係面皮愈練愈厚。先有保安局局長葉劉淑儀對大學生想「一睹其風姿」而「受寵若驚」，後有房屋署俾人鬧完重自己讚自己。
上個月黃大仙翠竹花園爆炸案發生，受影響住戶流離失所，當局遲遲都未安置，搞到天怒人怨。點不知房屋署班公僕厚顏得咁交關，喺今期嘅官方刊物《天地綫》大讚自己喺爆炸事故之後，「為有需要的居民火速安排臨時棲身之所。」又話二十四小時內「悉數閃電安置了住戶，過程中盡顯團隊精神」。
房屋署總房屋事務經理李鏡森重話同事了解到居民流離失所嘅痛苦，「遂以無比忍耐和克制完成工作。」八方本來對於政府部門唔肯認錯已經習以為常，但係今次衰到隱惡揚善，就冇法子唔講句：「頂佢唔順！」
傳真︰2623-9278
電郵︰