麥浚龍（Juno）早幾日喺港台接受《娛樂滿天星》訪問，點知一向大癲大肺嘅主持陳淑蘭（蘭子）勁寸Juno個樣似恐龍兼夾面青口唇白，當時在場嘅人都見到Juno個樣表現得好唔妥蘭子，重即時拎轉身。之後Juno唔知係咪激氣過度，個晚重踎低起身見頭暈入咗醫院。
噚日Juno去尖沙嘴出席「Neway仁人出手商助：環球偶像慈曆共送暖」記者會，佢話唔嬲蘭子話佢似恐龍，不過Juno好強調咁話：「蘭子不嬲都係咁癲㗎啦，可能我成日郁身郁勢，佢先覺得我即刻拎轉身，我反而驚佢話我面青口唇白，俾佢一講完，我當晚就入醫院，都幾邪㗎！我會叫佢唔好再話我面青口唇白。」
蘭子噚日都唔執輸透過電話訪問反擊Juno，蘭子話：「多謝佢畀面，如果我講嘢真係咁靈，咁咪係生神仙啦！」
何韻詩下年將會出新曲加精選大碟，EMI已經以高價向華星買咗阿詩啲舊歌嘅版權，所以隻精選碟啲歌都會幾齊。阿詩話：「我都希望喺未來有啲變化，以前我嘅形象rock啲，但𠵱家已經慢慢變得親切啲。」阿詩下年重會同黃耀明演音樂劇，佢話：「會喺下年二月演出，套音樂劇係講愛情，但表達方法比較抽象，我諗今次演出都算係我入行以來最大嘅挑戰。」
陳奕迅（Eason）去大馬宣傳佢嘅個人演唱會，重喺當地嘅第一世界酒店時代廣場搞簽名會，佢喺簽名會上面竟然倒自己米，同在座咁多人講話佢呢個月三十號喺大馬開嗰個演唱會冇嘢睇，佢話自己唔會換好多衫，又冇性感女舞蹈員，叫大家得閒就入場坐喎，Eason真係搞笑嘞！
余文樂一向都俾人話佢係𠝹女王，阿樂今個月十三號啱啱過完二十一歲生日，噚日佢喺尖沙嘴俾人問起佢緋聞女友Twins嘅蔡卓妍（阿Sa）有冇同佢慶祝，阿樂就話阿Sa都有打電話畀佢。問佢會唔會送生日禮物畀同月二十二號生日嘅阿Sa，阿樂就話：「佢搵咁多錢，唔使我送啦！」
谷祖琳加盟EMI之後，佢有首新歌《小菊》俾人話啲歌詞「誰又及我，粗生粗養，懶管你為我決定便宜訂價」，有暗踩英皇3T小花之嫌，但谷祖琳經理人錢小蕙解釋話：「其實首歌只係以小菊嚟比喻谷祖琳喺娛樂圈發展嘅心態，絕對冇暗踩其他人。另外，我都要澄清阿谷嘅新歌路係走感性路線，唔係走性感。」