恒指反覆一輪，埋單升54點。若非滙豐（005）彈升2.75元，恒指實係下跌40點左右。
中信泰富（267）受國內年底前傳聞撤銷外資固定投資回報保證影響，近期跑輸大市，不過昨日企定喺16.40元，冇跌到，而成交則繼續好勁，前市8球幾，昨日9球幾。跌市中成交大而股價唔跌，意味已經見底，沽家貨源一乾，趁低收貨者必然向上一踢，可以諗吓博Call輪。
中信Call輪9298最高做11.7仙，收10.5仙，微跌1格。總成交170球，佔發行量4成半，登場以來未試過成交咁勁，快見真章，應隨同正股見底。正股隨時反彈1蚊幾毫，隻輪隨時跟住一飛沖天。
中銀（2388）自從獲加入做恒指成份股後，股價牛皮，昨日微跌5仙，收8.20元。
滙豐有勢，有可能帶起中銀，中銀本身亦會耐唔中發吓燒，慢慢收集中銀Call輪亦無不可，對象係9462。隻輪明年7月到期，現價13.1仙，溢價4.8%槓桿率6.3倍，數據算吸引，想搏殺，則揀9459，呢件明年2月到期，現價39.5仙，溢價8.5%，槓桿率20.8倍，交投細過9462好多，注碼大難轉身。
章盛