謝霆鋒涉嫌妨礙司法公正案昨日完成刑期覆核，結果維持原判，須履行二百四十小時社會服務令，城中藝人紛紛表示替霆鋒感到高興。
容祖兒 ：我戥霆鋒開心呀！等我啲工作冇咁忙，遲啲我會上霆鋒屋企探下佢㗎啦。
曾志偉 ：咁正，都戥佢開心，不過好多嘢都要搞清楚有乜漏洞，但我由始至終都冇搵過佢，等佢可以安靜吓。
汪明荃 ：咪好囉！畀佢一次機會，之前都冇同佢哋通過電話，大家心照就得。
沈殿霞 ：Yeah！即係得咗，好開心，等人哋爸爸媽媽驚咗咁耐，先前因為大家都擔心，所以冇打過電話畀佢哋，都要打畀拉姑先。
陳百祥 ：真係好運，要祝福佢，希望佢好好掌握做服務令段時間，雖然件事之前受到好多輿論壓力，證明壓力唔可以影響結果，希望霆鋒日後做人小心啲，佢都係聰明仔。