香港人買大陸樓好多時都係貪佢夠平，一百幾十萬買層樓過吓業主癮。但上海豪宅東方倫敦‧伯爵豪園，樓價點講都唔算平，入場費要成四百幾萬，都夠買個香港中價豪宅，但依然吸引唔少港人落定購買。
個盤上個禮拜六、日嚟香港展銷，代理華置行朱映彤話，兩日吸引咗三百人參觀，其中十分之一重好有興趣北上實地參觀，𠵱家安排緊行程，呢一、兩個禮拜就可以出發。佢哋大部份都係中年生意人，喺上海有樓或者有廠，其中有十五個豪客，即時落咗五萬蚊人民幣定金，現樓都唔使睇就買，認真疏爽，原來唔少都係上海人，又或者有親戚喺上面住，好熟嗰邊樓市行情。呢次展銷反應都唔錯，聽講老細周正毅喺星期六下晝都有到場，重逗留咗半個鐘㖭。
上環帝后華庭終聞樓梯響，代理行已經排隊宣傳，今日由利嘉閣打頭陣，然後係美聯、香港置業、中原同鴻運。今個禮拜睇怕日日都有佢嘅消息。
利記租咗中環嘅Queen'sClub舉行帝后華庭誓師大會，揀呢度唔知係咪同個盤嘅英文名「Queen'sTerrace」有關呢？據聞利記重安排咗一場表演畀長實同新世界睇。聽聞呢一日總開支約六萬蚊。
另外，九龍倉嘅尖沙嘴擎天半島二期，今日會同十二家代理舉行正式委託儀式，同場重會有最新按揭安排，同介紹家具優惠，戲碼都唔弱。
擎天二期共收認購票逾二百二十張，有49%來自九龍，港島佔23%，連住南區嘅都有入票，比例係4%。而預留六十樓以上「擎天一閣」十二伙嘅買家，一半嚟自九龍，九名諗住買嚟投資，唔怪得發展商要提供迎合投資者嘅付款法啦。九倉話「擎天一閣」暫時封盤，但市場話只係封B室，因為預留單位中有十名選B室。
政府出招救樓市，確實令氣氛轉好，但二手市場都係以低價成交佔多，睇怕仍有唔少業主重係睇淡後市，所以趁勢賣樓。世紀21奇豐李峻銘話，馬鞍山新港城啱啱有個N座低層單位，446呎，以八十八萬賣咗，每呎兩千有找，1973蚊，比市價低10%。
另外，中原青衣分行黎耀基指出，區內青怡花園（圖四）1座中層D室，都只係賣到132萬，單位670呎，每呎1970蚊。佢重話個價比9月份景觀差啲嘅同類單位低7%，如果計埋景觀因素就平過一成㖭。樓價殘成咁，希望只因九招出手冇耐，遲吓會好啲啩。
深圳樓市有前景，多間本港地產代理行一早已經入去開分行，好似置業國際、中原地產同美聯物業等，同當地嘅地膽爭客爭生意。
由於深圳近年連二手樓市都愈嚟愈旺，所以地產代理行嘅數目有增無減。聽講連新加坡同台灣資金都有入深圳搞代理業務，真係應驗「瘦田冇人耕，耕開有人爭」呢句話。睇嚟深圳地產代理市場開始進入戰國時代，香港嘅代理行要贏都要付出唔少代價。
深圳住宅嘅二手市場近年開始成形，蘭西收到戴德梁行嘅物業報告，裏面都有提及二手市況，有埋成交個案供參考，認真詳盡。
噚日新世界同埋長實，喺長江集團中心開記者會，預告重頭項目帝后華庭。唔知係咪個盤太重型，何太（圖五）有啲緊張，記者會一開首，口快快講咗新世界嘅太子別樹華軒，好彩佢反應都好快，隨即更正番。
無幾耐，介紹個盤享有市區便利嘅時候，佢又話鄰近工廠區，後嚟知道講錯咗，即刻話：「唔係，係鄰近市中心核心區至啱」。睇嚟何太近排公務一定好繁忙，至會忙中有錯。
仲量聯行屬下嘅LaSalleInvestmentManagement表示，成功為亞洲復興基金完成集資，重計劃喺亞太區收購為數46.8億（即六億美元）嘅物業。呢個基金今年已經喺東京同漢城傾妥會買嘅物業，夾埋有四項，總值17.55億。換句話講，呢個基金重有29.25億可以買物業，若有一半流入本港房地產市場都好緊要。
個基金集資者包括來自美國、歐洲、澳洲、中東同亞洲嘅主要退休基金，總共十五家。
蘭西
電郵地址：