時下青年男女結婚，只要家庭富裕，肯用錢嘅，都喺酒店宴會廳擺酒；最有型有款嘅，以前一定係麗晶，改咗名之後，一來「洲際」冇咁好聽；二來新世界中心一帶，因建築九鐵，成為孤島，交通冇咁方便；三來香港賓客過海，交通擠塞，所以灣仔君悅酒店就搶咗好多生意，成為港島區結婚酒熱點。
天爺係《壹週刊》創刊總編輯，周刊記者編輯，多數係佢嘅門生故舊，所以有「天爺」嘅外號，今年正式自出版界退休，太太亦自社會福利署嘅高薪厚職退休，兩公婆齊享清福。佢兩位嘅千金今日出嫁，晚上在灣仔君悅酒店擺結婚宴。原本係大喜事，點知碰上大人物到港，君悅猛咁追問出席今晚婚會嘅人客名單，搞到天爺不勝其煩。我請飲，使乜要話畀酒店聽我請邊個呀？天爺俾君悅煩到抽筋，幾乎想轉地方，但係臨時之間，帖又出晒，邊有得轉吖，惟有照舊。
天爺話：「現在先至知道係乜嘢事咯，原來今晚（十九號）朱鎔基總理到港，入住君悅酒店，灣仔北喺八點開始至八點四十五分封路，到時一定會交通大擠塞，所以請你早啲到，八點前入到嚟！」大公關華德本來要走兩台戲，七點九先至可以離開西環，聽見天爺咁講，為之大皺眉頭。冇得講啦，總理駕到，乜人都要相就相就，各位出席天爺嫁女酒嘅老友記，今晚記緊早啲到。