雖然係人都知嚟緊十一、十二月會有好多勁Game出籠，不過Game舖老闆普遍都唔敢肯定係咪真係可以帶得起個市，CAPCOM隻王牌Game《BioHazard0》原定21日先喺日本推出，行貨早幾日就派貨落場（11月16日），搞到星期六全港九大小Game舖極之旺場，出現多年罕見的人龍，有店舖更表示五百隻現貨一日內賣清㖭，邊個話市道低迷？
記者、攝影：徐影龍 鳴謝：Capcom(HK)
雖然日本預定21日先正式推出，不過香港各大Game舖一早收到風話《BioHazard0》同《龍之戰士V》都有機會預早派貨落場，到星期六下午果然有貨，好多機迷都聞風而至「撲Game」，當中重有唔少人即場買埋GAMECUBE㖭。
據筆者現場觀察，的確有好多機迷圍住Game舖睇Demo同試玩，叫價五百都有唔少人幫襯。由於部份人連GAMECUBE一齊買，需要即場試機，所以Game舖居然間歇性咁出現排隊人龍，呢種情況已經好多年冇見，有店舖埋單計數，五百隻存貨一日賣清，連GAMECUBE都賣到二十幾部。證明只要有好Game，一樣大把人支持。
100張大海報免費送畀你
繼之前《龍之戰士V》後，CAPCOM又印製咗一批《BioHazard0》大海報，原定係跟行貨附送，不過就額外預留100張大海報畀蘋果《打機樂園》讀者，只需手持今日《蘋果日報》本版，就可到DreamStore免費換領一張大海報，先到先得，換完即止，手快有手慢無！
其實《BioHazard0》能夠吸引咁多機迷，除咗系列夠出名外，當中重有兩大重要元素，其一係一個人玩可以同時操控兩個角色，呢點可謂《BioHazard》嘅重大突破，過往極其量都只係按劇情轉換操控人物，而今集就破天荒咁可同時控制男、女主角，透過轉換系統，就可獲得一般方法攞唔到嘅重要道具，例如女角Rebecca以升降機傳送「尖插」畀男主角Billy，Billy便可解除門鎖阻礙而逃走，類似情況會經常發生，用家宜盡早熟習交換系統。要注意今集只有女角Rebecca可以混合藥草，而男角Billy則可使用打火機，令兩名人物都各有特色，互補不足。
今集放置道具位置少得可憐，分配道具須深思熟慮，如未經混合嘅藥草便應交由Rebecca保管。順帶一提，今集取消任取任攜嘅四次元空間儲物箱，道具拎唔晒，可隨地亂放，返轉頭攞番都得，呢個改進令遊戲更接近真實。
《BioHazard》系列出名謎題刁鑽兼難明，今集改為同時操控兩名人物，直接令難度倍增，因為好多時需考慮二人特性及所在位置，再細心分析破解之法，最常見係搵一條鎖匙要二人傳嚟傳去，上上落落先開到指定嘅門，少啲心思都冇佢符。
至於敵人方面，當然唔少得同屬主角級嘅喪屍一族，不過唔知係咪見得多，機迷已經唔會再俾佢嚇倒，反而新加入嘅敵人更有驚嚇味道，如突如其來破窗而入嘅喪屍狗及不知名嘅幼蟲等，尤其係屬首領級嘅蠍子王，比試玩版時更早出現，幸好Rebecca啱啱執到支散彈槍，不致陷入困境。
筆者一直有捧開《BioHazard》場，最欣賞嘅除咗《Code:Veronica》外，就到呢隻。要突破舊有框框創出新元素已經唔易，今集一人操控兩人嘅系統實在值得一讚，尤其係面對複數敵人時，二人聯手的確易對付得多。不過二人系統亦有好多限制，如必須同處一室才可交換道具，下達指令等，加上今集不設四次元箱，成日都要反覆走嚟走去，都幾煩悶。由於今集取消《BioHazard3》嘅閃避系統，而180度轉身又唔夠快，感覺上動作好似冇以前咁爽。
遊戲類型：AVG
對應機種：GAMECUBE
遊玩人數：1人
開發商：CAPCOM
(c)CAPCOMCO;LTD.2002ALLRIGHTSRESERVED.
DreamStore
地址：灣仔東方188商場256號舖
電話：25753285