古人甚好笑，見到些甚麼，便很容易有所感觸，感觸時，就會寫詩。
近日我復古，以響應經濟復古到大約元朝那個水平。復了古的我，見到「少少嘢」也感觸良多，且也要寫詩。以下，是讀畢上星期一則新聞寫下的。新聞的標題是「傷殘運動員祝捷曾蔭權灑淚」。我這首詩的標題是《條廢柴又喊》，請多多指教。
條廢柴又喊
條腰就快瘦到褲甩因為搵食艱難，
條嘢就快縮到消失因為壓力千擔，
三條化骨龍供書教學唔係咁簡單，
一條麻甩佬一個黃面婆經已死慳，
但係兩個人做得到嘅嘢極之有限，
一家五口兩隻荷包蛋咁就係一餐，
條尾龍骨斷，孭住負資產，
身爛世又爛，連假牙都爛。
一條條粉腸識得講「共度時艱」唔識得承擔，
我條氣谷到上心口再上額頭再直上獅子山，
嗰條煲呔又做秀篤篤撐，
我條化骨龍都未喊，條廢柴就爭住喊！
條脷就快爛因為日日鬧班杏加橙，
條水喉鐵就快揸到爆因為想扑橙，
十幾條×街司長薪酬個個唔簡單，
一條龍變一條蟲我盡力適應習慣，
但係一條友做得到嘅嘢極之有限，
叫班龜蛋減薪佢哋面口即變屎坑，
佢條煲呔正，我條底褲爛，
我條青筋現，佢哋笑容盞，
經濟唔理淨係搞乜×第廿三條講到我心煩，
一條條粉腸一條條×街又點知乜嘢叫做慘，
嗰條煲呔又做秀篤篤撐，
我個黃面婆都未喊，條廢柴就爭住喊！