拍攝中的賀歲片需要一個主景作為楊千嬅戲中的家，能夠稱為主景，即係起碼有幾天連續在該景內拍攝，故此大家對這個景的選擇非常嚴謹。劇本內基本上已列出了對這個景的要求：!不能豪華，但要雅潔；@不能太大，但更不能太小；#樓底要高；$舊得嚟要有性格；%起碼要有兩間房；^要有走廊；&因為要連續拍幾天，故此最好本來是吉屋；*最重要亦是最後一點，最緊要抵租。
製片部的同事於是頭岳岳揸住啲要求通香港、九龍、新界搵。本來最簡單直接兼現成的方法係搵「片場」，即係一啲大家已經借慣借熟嘅地方，差唔多一講出嚟，行內人全部都知喺邊條街幾多號幾多樓，但係呢啲「片場」經已被拍到呆呆滯滯，莫講話行內人，就連觀眾都睇到熟晒，如果喺呢種地方再拍，兩個字講完——冇癮。
製片部同事非常有「心」，捨易取難，見到啱心水嘅地點，冒昧拍門問肯唔肯借出或租出拍戲，雖然大部份時間都係得個問字，但係皇天不負有心人，終於覓得一處與劇本中描述有八九成相似的單位，戶主亦欣然答應短期出租，實在係行運。
在這主景中度過了四天，拍極都覺得好有新鮮感，這是非常難能可貴的。一齣電影的成功，有賴各部門的通力協助，每位成員肯多跑一步，電影便發多一分光。香港電影業中確然還有很多有心人，只要有他們存在，香港電影應該可以捱得下去。