名人食點：
歐陽妙芝趁寒進補

冬天我鍾意去ShoppingMall行街買衫，因為可以一肚餓就搵到間餐廳立即醫肚，之後又再繼續瘋狂買衫。剛巧上星期大買特買之際，碰到身材勁Fit的Model歐陽妙芝Christine周圍望，原來正在搜尋最新出爐的滋補食品，我當然唔執輸，點都跟埋佢去試新菜啦！

記者：梁佩芬　攝影：陳穎
服裝提供：Chevignon　
髮型：AdamfromHeadquarter

氣溫再度下降，突如其來的冷風又把我們殺個措手不及，都唔明點解冬天個個女仔都不懼寒流，幾凍都只着件薄如輕絲的外套出街就算，成日都凍到「殊殊」聲，連Christine都話成日手凍腳凍，又點都唔會食多兩啖飯落肚，只靠飲大量湯水滋潤身體。當知道尖沙嘴海港城今日開始，有一大堆最新出爐的冬天滋補食品，重唔第一時間走去試最鍾意嘅西班牙佛跳牆。

烤鹿肉卷$120（老富昌）
半生熟助利尿
新西蘭冬天剛過，所有動物都養得又肥又健壯，以鹿產量最多，其中又以鹿膊頭最好吃，法國人只煮到半生至七成熟就吃。但我們不慣吃生，大廚便用上馬棗林及他力勤香草醃製去除羶味，再用白酒浸軟鹿肉，就算全熟都不會變韌。配合有利尿功效的法國果實杜松子製成的醬汁，吃時帶有肉桂及丁香味道。

西班牙佛跳牆$200（ElCid）
熬足一夜好禦寒
初初以為熱情奔放的西班牙人唔怕凍，原來都要飲湯禦寒，不知是否時常好勇鬥狠，連飲湯都用大量肉，一斤腩肉、一斤牛腩、一隻大豬手、幾百粒雞豆及一大條西班牙血腸，用慢火熬足一日一夜，放涼後刮去浮面的湯油，入口又濃又醇，大煲精華最適合工作疲勞及睡眠不足的人飲用。今日起至二十九號只賣$200，之後就要$400。因煲湯需時，每日供應約十客，需預定。

珍珠雞$158（Cova）
食肉都可以解渴
法國野生珍珠雞，經常四圍走，皮下脂肪少，肉質結實爽口，特別之處是肉味帶酸，吃後能消渴，更有助治痰氣、止氣喘，更可益肝補血。

記者推介
海港城各食肆今次藉着深秋間推出最新菜式，我亦當然唔執輸，眼見Christine食完各碟補品準備離開，又趁未食晏晝，我亦同攝影師揀了其中兩間同樣推出秋冬進補菜式的食店，試試他們的主打進補菜式，等你下次到海港城搵食都唔使盲舂舂嘛！

五蛇羹$24（福滿樓）
全「城」最平補品
粵菜中，蛇是名貴補品。入冬後蛇即冬眠，搞到周身肥肉，故此不會有嚡口的感覺，加上小小一碗有齊鮑魚、花膠、木耳、冬菇，混合五種蛇炮製，再灌入熬上五小時的雞上湯，$24咁平，日日進補都唔會肉痛。

蝦兵蟹將$228（雪園）
用薄餅食陽澄湖蟹
以前，上海官賈名流才食得起的蟹粉炒河蝦，矜貴在一碟菜用上幾隻陽澄湖大閘蟹的肉、膏，咬落盡是蟹粉的鮮甜味，再加上產量少又爽口的淡水河蝦。這碟名菜最近更玩花臣，我們可以如食片皮鴨般，用薄餅夾着吃。

ElCidCaramerTapas&WineBar
地址：海港城ShopG315
電話：27212181

老富昌法國餐廳
地址：海港城Shop2608-2610
電話：21177171

福滿樓
地址：海港城Shop3202
電話：27309131

CovaCafe
地址：海港城ShopG220
電話：29073882

雪園飯店
地址：海港城Shop3303
電話：21171038