八方噚日講過李澤楷參加帆船賽，今日當然要講埋下集。小小超今次艘新帆船Pinta競逐「Panerai環島帆船大賽」，成績果然厲害，一共用了四小時三十二分便完成整個航程，第一名衝過終點。
不過，由於大會要計算埋船隻馬力及其他因素，結果小小超艘船四甲不入。大會只公布頭四名名次，故此小小超艘船係第幾名無法考究。不過，率先衝線亦算係佳績。
呢排電盈股價日日升，今次帆船比賽又咁快，對小小超應有一定鼓勵。不過，由於盛傳電盈即將再裁員，隨時派幾百個大信封；一位與小小超相熟的友人同八方講，大家咪以為小小超只顧住玩唔理公司事務，其實今次佢去賽船，只係為了減壓。
小小超自入主電盈，一直忙於業務重整，根本未停過，好多朋友都勸佢休息吓，但休息都要有嘢做。小小超以前最鍾意得閒去駕駛小型飛機散心，但在香港比較難玩呢項活動，玩遊艇就較易，所以小小超決定買艘遊艇，估唔到今次一出戰就跑第一，食詐胡都冇所謂啦。
傳真︰2623-9278
電郵︰