小妹妹上戶彩呢排除咗忙住以男仔頭造型進軍樂壇之外，重要為佢套處女電影《ATSUMI》喺京都開工，《ATSUMI》係改篇自小山優創作嘅同名漫畫。起初，我羅拉重以為套戲淨係為咗捧吓上戶彩，點知一睇卡士，都幾勁。有實力派嘅竹中直人、原田芳雄，同埋新紮靚仔ODAGIJoe，彩妹今次真係執到支好籤。
彩妹重自爆拍第一場戲嗰陣，唔小心打親自己個額頭，即刻入院照X光。個醫生話好少見啲人個腦咁大嘅，佢即刻好天真咁問係咪會聰明啲。
不過對我哋啲漫畫迷嚟講，最吸引都係彩妹一身嘅造型同原著漫畫嘅女殺手好鬼似。聽講佢為咗做好個角色，當其他演員拍完戲去食消夜嗰陣，佢就留喺房度休息同練習武打。
原來彩妹好貪靚，佢話驚休息唔夠，個樣殘上鏡唔靚喎！重有，咪睇佢揸住把刀好粗豪咁，唔使埋位嗰陣，佢就揸住塊鏡同埋唇彩，猛咁照，真係服咗佢！