張衞健（健仔）前晚同女友張茜、蘇永康等去灣仔君悅酒店飲完嘢，噚日就出席沙田「敬老護老愛心券」開售禮，有人問佢張茜留喺香港係咪住喺佢屋企，點知健仔好坦白咁話：「梗係啦，咁嘅時勢重租酒店咩，慳得就慳啦。」
健仔噚日同班婆婆跳健康舞，班婆婆好鬼熱情，重攬住佢嚟錫。之後，健仔去咗黃大仙為《齊天大聖孫悟空》宣傳，由於要等埋由馬來西亞返嚟嘅Twins，活動遲咗二十分鐘先開始，令到現場噓聲四起。不過，當健仔佢哋派《齊》劇毛公仔時，現場反應又好鬼熱烈，混亂中重有個婆婆跌親，好彩冇乜大礙。健仔真巴閉，連婆婆都俾佢搞到神魂顛倒。
另外，健仔又話，前晚佢去完商台做訪問之後坐保母車走，點知隔籬部車撞埋佢部保母車度，嗰架車個司機一見到健仔，即刻拍一拍佢膊頭，然後又猛讚健仔。搞到健仔鬆毛鬆翼，唔理對方啱定錯都照賠錢。
余文樂同麥浚龍等噚日一早八點幾去觀塘出席活動，余文樂同麥浚龍前晚都係由無綫高層何麗全通知，先知要出席活動，不過余文樂重要九點幾趕去廣州攞環保之星同「十一月城市主打星」獎座。問佢係咪怕影響年底頒獎禮得獎嘅機會，先唔敢缺席？余文樂話：「唔係，我以為單嘢八點半會趕得切嘛，頒獎禮大家都有機會嘅。」而何麗全就話：「完全係度期問題啫，我係同樂仔熟，同Juno都OK，唔好咁敏感啦！」
盧巧音（Candy）、陳曉東同鄧健泓噚日喺黃埔出席活動，佢哋重整陶瓷，東東同Candy四隻手搓嚟搓去，有啲《人鬼情未了》feel㖭，Candy一邊玩一邊甜笑，個樣好冧咁。事後問佢係咪好有feel？Candy話：「好有感覺，好熱嘅感覺呀，一男一女玩係幾浪漫。」東東就大讚Candy對手好滑，問佢鄧健泓對手滑唔滑？東東話：「我分唔到係泥定係佢隻手喎！」
鄭伊健噚日去海下灣出席活動。伊健重比同行嘅導師整蠱，話說伊健好好奇咁摸吓棵紅樹，導師見到就好嚴肅咁話：「呢種植物係有毒，掂咗之後十分鐘皮膚就會開始麻痹。」嚇到伊健即時縮手，重睩大眼唔知點算，於是導師就笑住話：「講笑咋。」伊健先識笑番！
陳慧珊（Flora）噚日喺奧海城同班fans聚會，見佢趕頭趕命咁，原來Flora為無綫台慶當晚着嗰件晚裝而煩惱，大家都知年年台慶個個阿姐都要鬥靚衫鬥行頭，淨係首飾贊助都話過千萬，不過Flora就話想着得型啲，唔知係咪費事同啲阿姐硬碰呢！