紋身唔一定要去老尖紋身館、玩塔羅牌占卜唔一定要去老廟搵神婆，因為有酒吧一次過提供紋身與占卜玩意！
嫌酒吧多人眼睥睥周身唔自在？又得啫！撥個電話，約好時間，紋身師傅與占卜師準時到達你府上，坐定定，先占卜問前程，知結果，再紋身幫你加強運勢，到會服務頭搭尾唔需要一粒鐘。
記者：陳漢榮
攝影：楊錦文、陳漢榮
灣仔老牌紋身館的大當家肥佬，無人不識，幼子Delta是駐場紋身師傅之一，今次新玩到會服務，原因何在？「其實老早想自立門戶，但搵唔到理想地點開舖。咁啱有個玩開塔羅牌嘅師弟Leo入行，佢建議不如將兩樣服務結合，兩師兄弟打孖上，玩到會，叫做有啲新搞作！」
師承吉卜賽巫師
玩塔羅牌踏入第8個年頭的Leo插嘴：「我喺台灣讀書時識咗個吉卜賽巫師，係佢教我玩塔羅牌嘅，我翻查過啲印第安典籍，裏面提及過紋身圖案可以加強同改變一個人嘅運勢，所以咪學埋紋身囉！」Leo自言學藝未精，現階段只敢替客人「臨時紋身」，可保存3日至10日，視乎顏料而定，至於永久紋身，則全由師兄操刀。Delta本身不懂塔羅牌，加上甚少客人會要求上門永久紋身，所以甚少出手。至於在酒吧擺檔，則只提供短暫紋身，Leo說：「始終係酒吧，無設備、燈光又暗，以一個簡單嘅蝴蝶或字母圖案嚟計，連占卜30分鐘內完成。」
Leo玩的是「大十字占卜法」（Big-Cross），每次只會揭4隻塔羅牌，點玩？即Check。
占卜StepbyStep
1.插牌
從整副牌中隨意抽1隻塔羅牌，全神貫注，說出此牌圖案給予你的感覺，然後將牌任意插入牌叠裏。
2.洗牌
用洗麻雀的方法洗牌，同時心中默念你想問的問題。
3.結印
說出你的問題，Leo會邊結「三角手印」邊洗牌，最後將牌叠排成十字形，每次只會揭4隻牌，依牌的指示替你占卜。
4.選擇圖案
得出占卜結果，Leo會給予意見，由你選出能加強或改變運勢的合心水圖案，在牛油紙上模印出來。濕水的牛油紙把圖案印在肩上，用黑線先勾劃圖案線條。
5.上色
之後是上色步驟，上完色，再用沾上顏料的牙籤點陰影位，加強圖案立體感。完成後在圖案上撲粉，保護兼防甩色，大功告成！
驟眼所見，Leo不乏捧場客，雖不致大排長龍，但短短個半小時內已有三個女仔幫襯，個個讚Leo的占卜靈驗，重有人即場求Leo收佢為徒㖭。
1.Cindy（23歲）
問：我同男友未來半年會唔會分手？
「Leo話我哋嘅感情由濃轉淡，兩個人都各有第三者，係呀，𠵱家我哋成日為小事嗌交，兼真係有人追緊我噃。不過好彩，佢話第三者唔會對段感情構成威脅，打風打唔甩……我覺得好準，重諗住拜佢為師㖭！」
2.雯雯（22歲）
問：真命天子會唔會喺一年內出現？
「好開心呀！佢話真命天子老早出現咗，戀情早已醞釀，只係我唔察覺啫，佢笑我眼角高，好多人追但我統統睇唔上眼，又講得幾啱噃，好多男仔問我攞電話，我好多時都一口拒絕，咪嘞，聽佢話，多啲留意身邊人。」
3.Pinky（27歲）
問：我幾時搵到一份有穩定收入嘅工作？
「佢話我太過直腸直肚，忍唔到老闆或者客人嘅無理取鬧，所以未來半年多數撈長散，都OK準嘅，呢半年我做過文員、Sales，無份做得長，今日重啱啱同老闆嘈完，睇嚟真係要忍吓喇。」
加強健康運：星座、翅膀
改變事業運：構圖誇張荊棘花（撈偏門），紋太陽、齒輪（做正行）
到會服務小資料
名稱：GodzillaTattoStudio
預約電話：91528679
致電預約時間：12:00nn至12:00mn
收費：面議。臨時紋身加占卜（1條問題），最低收費$300；永久紋身加占卜（1條問題），最低收費$400，視圖案複雜程度而定。
酒吧駐場
星期三、五：修士吧（8:00pm至2:00am）
星期四、六：猜兩板（8:00pm至打烊）
收費：$50至$60（1條問題）每個圖案$30起