每次電單車比賽完畢，車手都好鍾意喺賽道上磨胎慶祝，不過噚日格蘭披治電單車賽嘅車手，就一反傳統，冇喺賽道磨胎；反而入返維修站先開始磨，high就幾high，不過就搞到煙霧瀰漫、散發濃烈燒膠味，在場幾百位維修員、記者同嘉賓都要一齊受罪。
澳門車手古圖喺東望洋大賽中段，喺葡京彎發力過咗一級方程式車手大衞遜，進佔第三位，重好得意忘形咁，向裝喺佢車內嘅鏡頭面前手指指，嘲笑大衞遜；不過古圖都冇乜好結果，尾段佢架車喺文華東方彎撞埋欄，被迫退出比賽，所以話做人要謙虛啲好。
一連四日嘅澳門大賽車噚日曲終人散，維修站就好似嘉年華會咁熱鬧，好多車隊、贊助商都派禮品，汽車貼紙、海報、電話繩都任攞唔嬲，車手又將戰車泊出維修站，與觀眾合照同簽名都冇托手踭，觀眾可謂滿載而歸。