政治遊行又關女星劉嘉玲事？約一百名市民噚日遊行去政府總部抗議公安惡法，一如所料去到閘口外面嘅斜坡就俾警方攔住，班示威者好不滿，問警方點解上次一大班演藝界人士可以上去，佢哋又唔得，大鬧警方大細超。
示威者同警方爭持咗好耐，愈嗌愈嬲，其間有人大嗌「天地不容」，跟住「甘仔」甘浩望神父就話：「叫成龍嚟，叫劉嘉玲嚟！」參加遊行嘅立法會議員鄭家富更即刻插口話，𠵱家現場有立法會議員劉慧卿（劉）、有佢（家）、同埋有個叫阿玲嘅支聯會成員（玲），加埋就係「劉家玲」，叫警方快快開大閘，實行擺劉嘉玲上枱。當然，警方最後梗係唔鬼理呢個三合一嘅「劉家玲」啦！
傳真︰2623-9278
電郵︰