好有創意嘅香港興業，上個禮拜搞咗個「藍天海岸100萬之謎」記者會，蘭西當然去了解吓啦！原來係「100萬呎全方位環境規劃」喎！聽到蘭西一頭霧水。香港興業市務部總經理陳子明（圖一）解釋，即係由居所組合、海岸公園、逾四十項設施嘅會所、兒童天地、購物庭園同環保建築設計，夾埋晒就變成「100萬呎全方位環境規劃」嘞。
再詳細啲講，居所組合就係將高中低密度樓宇錯落有致咁排列，營造出空間感；海岸公園包括十二個主題休憩園林；其他就係用環保設計、材料，同附近有大商場，即係生活配套啦。
哦！即係一句講晒，介紹個盤有乜優點同設施，話畀買家知，有一百萬呎嘅生活空間，但點樣砌到一百萬呎，蘭西到𠵱家都計唔掂。最後香港興業送咗盆植物畀蘭西，咁睇佢哋最想講應該係個盤嘅綠化環境啩。
打高爾夫球、飲紅酒，呢啲富貴嘅玩意同生活品味，唔係人人都有資格㗎。𠵱家就有人出埋錢畀你去歎，真係有咁筍？利嘉閣地產董事廖偉強講，佢哋會請專人，教負責豪宅嘅代理上流社會社交禮儀、飲食同消閒活動，目的係要佢哋更掌握富豪喜好，等做佢哋生意時，溝通都容易啲，重有就係唔會出洋相。
上個禮拜利記就率先喺港麗酒店搞試酒會（圖二），有唔少豪宅部同事出席。
蘭西以前都有聽業內人士講，有啲豪宅部頭頭，會帶新同事去高級夜總會及食肆盡情享樂，等佢哋知道有錢幾咁好，之後就會搏命去搵銀，公司收入自然「豬籠入水啦」。
美聯物業再度催谷「豪宅天下」品牌，集團營業董事Vincent（陳坤興）講，由10月到𠵱家已經透過獨家代理方式，做成九單買賣，總值近一億。
Vincent話，獨家委託優點係代理可以根據各豪宅嘅特點，度身訂做市場推廣方案，所以一般成交價都理想啲。
另外，美聯噚日有六十多人，參加由「健康快車」主辦嘅慈善步行籌款（圖三），幫內地失明人士重見光明。行程原訂兩小時，美聯用咗個零鐘就行完，之後有部份同事重去尖沙嘴擎天半島為同事打氣㖭，活力十足。
長實為促銷樓盤，好多時都會踩吓對手，似乎唔夠厚道，但唔可以唔承認佢哋認真多橋，付款辦法一個接一個，宣傳噱頭層出不窮。
上個禮拜長實為長沙灣泓景臺提供多一款「衣、食、住、行」優惠付款法，都係啲例牌嘢，但今次有樣嘢好吸引蘭西，就係以立體形式嚟介紹，唔似以前咁用一塊紙板搞掂，例如講「衣」，就用公仔衫，背面就係單位立體模型。介紹「食」時，即推架裝滿食物嘅百佳手推車出嚟，夠晒新意。
長實將宣傳方式由平面走向立體，聽講係因為佢哋已經成立道具部，以後一定有好多精采嘢睇，而且電視台道具部員工可以多條出路，製造就業機會。
由新世界、長實同市建局合作嘅上環帝后華庭，今日開記者會公布物業最新詳情，開售之期不遠。呢個盤嘅嘢一向都由新世界發布，代理都係去新世界總部開會，但最近就移師長江集團中心，唔知代表乜嘢呢？
另外，鴻運近日喺德輔道西租咗個舖，作帝后華庭嘅支援分行。港島營業董事沈國智話，呢個盤公司會主攻投資者同換樓客。而高級區域經理關仲年透露，入票期間，會出動超過二百人，希望攞到兩成市場佔有率。
政府救樓市措施啱啱出台，最特別一項相信係取消買一個單位只可買一個車位嘅限制，唔知係邊個諗嘅呢？咁都可以救到市？蘭西問過專做按揭轉介嘅經絡集團，佢哋話公司嘅數據顯示，置業人士連埋車位一齊做按揭嘅個案，只佔總數4至5%，重係包括一二手嘅數字。
其實，買家要多過一個車位，通常都會係啲豪宅，但家吓最唔掂嘅又唔係豪宅，況且交投多都未必可推動換樓潮。呢項救市措施背後有乜玄機，真係要高人指點嘞。
蘭西
電郵地址：