廉政公署控告霍達，結果就係霍達被判無罪釋放。呢一單官司其實係馬圈大事，《南華早報》用咗差唔多兩版（體育版）嚟報道，不過中文報紙馬經版就費事理，大概係「貼士」佔晒啲版位，冇空間啦。
廉記控告貪污嫌疑犯，據講成功率高達八成四，但係唔知點解，上親新聞版（即係有新聞價值）嘅案件，我哋印象之中，就係廉署經常輸，嗰位代表被告嘅林律師，時時喺電視見到佢嘅嘜頭，似乎真係廉署剋星噃，當然，重有一位大狀艾勤賢無處不在，無役不與㖭。
參加午餐會，啱啱坐響大狀T隔籬，順便問佢對霍達案點睇，大狀T話：「霍達有兩個有利之處，（一）艾勤賢以前係律政署專代表廉署做檢控嘅律師，佢熟晒廉署嘅檢控策略，林律師亦都係廉署出身嘅，（二）馬會受薪董事做被告（霍達）證人，相當權威啫。」點解廉署控告騎師，居然搵唔到馬會專家做證人，而係做「敵人」呢？係ＩＱ題嚟㗎！
大狀T又話：「同廉署打官司未必會輸嘅，但好容易傾家蕩產，贏咗都成副身家畀咗律師。廉署用公家錢，可以猛咁使，被告用私己錢，好容易、好快就會入肉；所有可以代表被告嘅「打廉記」專家，收費一啲都唔平，所以千祈咪惹上廉記呀！」聽見都怕啦，最緊要做事小心啲，咪惹禍上身。