孫明揚宣布救市九招，主要係限制供應，對刺激需求就冇乜好搞嘞。分析師Eric對孫九招歡呼拍掌之餘，對冇第十招──樓按九成──深感遺憾。
Eric話：「孫公夠膽放寬樓宇按揭上限至九成，就夠晒十全十美，可以做『十全老人！』」左丁山馬上提醒佢：「樓按成數上限係金管局範圍，唔到房屋地政規劃局去管喎。」Eric話：「我知，我只係想話佢唔敢去到盡，迫任志剛就範啫。」任局長喺立法會對議員講到明，為顧全銀行體系嘅穩定性，唔會放寬樓宇按揭上限，滙豐柯清輝亦話唔應該放寬，Eric點解重要講？
Eric解釋：「限制土地供應固然會影響樓價，但需求增加先至會令交投暢活。假如市民可以直接向銀行借九成，而唔係借七成再向按揭債券公司買額外兩成保險，再借埋嗰兩成，市民可以慳番保險費同額外利息，供樓就更加容易，點解孫公話到背城借一，乜招數都出齊，偏偏呢一招就慳番，唔去同任志剛爭取呢？」
點解？幾難解釋咯，孫九招宣布之日，孫明揚、曾俊華、梁展文與一班傳媒人食晚飯解畫，聽講梁展文講咗一句：「董特首放手去俾我哋做！」既然放得手，唔怪得孫九招推翻晒特首以往嘅八萬五、七成置業目標，撥亂反正。儘管如此，孫曾梁三位智者仍然冇任志剛符，任局長果然唔係公務員，夠晒獨立性。