澳門大賽車昨展開，點知天公不作美，兩場電單車賽都因為天雨關係，要押後到今日舉行，而好多記者行家晨早到新聞中心準備搏殺；但賽會宣布賽事延遲，變咗冇嘢搞，大部份行家都去就近嘅酒樓醫肚兼打發時間，差啲迫爆間酒樓。
噚日現場所見有唔少汽車商號喺維修站擺檔賣嘢，當中以日本Yokohama所賣嘅風褸（三百元）、雨傘（百二元）、T恤（五十元）及帽（三十元），就因為價錢大眾化而大受車迷歡迎，迫到攤檔水洩不通。
「少年車神」張煒安原定噚日朝比賽完，夜晚就返香港，慳番晚酒店錢，點知賽事因雨改期，佢無奈要喺澳門留多晚，但佢又冇訂房，真係好彷徨；而場車改喺五點鐘先至鬥，到時差不多天黑，到時可能要加燈先可出賽。