鬥完噚日嘅雷諾方程式挑戰盃，今年我就再冇比賽啦，諗番由一個寂寂無聞嘅小女孩，到𠵱家咁多人識，呢一年對我嚟講真係有意義。
重記得上年現場睇澳門賽車，曾經半認真地諗過第五十屆（○三年）有機會落場鬥就好，點都估唔到一年時間就夢想成真；其實今年自己喺賽車嘅發展都算唔錯，由三月開始學康巴斯方程式，到六月獲意大利長城車隊賞識，有機會進軍F3000，過程都幾順利。
不過有得必有失，我本身都幾鍾意讀書，為咗鬥車而要停學一年；加上媽媽同經理人成日要我顧全形象，好多「低B」嘢都俾佢哋禁止，好似我鍾意食波板糖咁，不過媽媽就唔畀我喺街度食，話我「低B」喎。
今次到澳門鬥車，身邊所有人都極之支持我，噚日我重兩次因為一時感動而喊咗出來，令我深深體會到，得總比失多，證明自己行呢條路冇錯！
長城車隊車手鄧穎詩