狼狗媽咪阿Kim的十胞胎，由夜晚生到第二日下晝三點！可惜十兄弟都活不過一天！原因是牠懷胎期間仍愛拍烏蠅，動了胎氣早產。訪問當天，阿Kim又剛誕下了麟兒！生命本來就很奇妙，難怪主人David愛上繁殖狼狗。「我鍾意狗女多啲，可以挑選下一代。」David以業餘性質配種，兩年來製造了34個小生命。
記者：吳佩璇
攝影：伍慶泉
01年初，David於阿Kim來潮後的第9及第11日，先後2次帶牠到狗場配種，最後成功懷孕。David便在屋內間了個小地頭，作為阿Kim的小產房。一天，David下班回家，因天冷關係，阿Kim竟爬到自己的床上生仔！9隻烏卒卒的狼狗BB，加埋阿Kim，將潔淨的床鋪塗上了黑。「我一打開道門見到成張床黑晒，原來都係狗仔！」第一次接觸初生BB，David開心得要命。只是成床成地都有血水，足足花了2、3小時才清理好，甚麼棉胎、床單、被鋪統統無得留低！
養開狗女的David，今年4月才買入台灣狗公Happy，然後與阿Kim交配。雖一擊即中，但卻因早產個多星期而全部夭折！David失望說：「我嗰晚睇住佢生，生到第二日下晝3點。由於早產奶水唔夠，BB又啜唔到奶，用奶樽餵都唔得，惟有用針筒滴奶，點知都係一日就死晒！我同阿Kim都好唔開心。」這次失敗，究其原因可能是阿Kim懷胎時仍常常撲烏蠅，動了胎氣。
事隔半年，阿Kim與Happy竟意外懷孕，但最搞笑是這次只有3胎，唔覺大肚，連David都不知牠有咗。難怪David跟記者的第一句見面禮就是：「阿Kim啱啱喺尋日生咗，我都唔知！」
除了阿Kim，David還養有另一隻狗媽咪BoBo。同阿Kim一樣，BoBo曾三度懷孕，不同的是BoBo每次都是到狗場找專人交配。大部份的小生命，David都會送給朋友或拿到寵物店出售，全部都有晒出世紙。
David養過許多狼狗，最巴閉的是Gordon。99年買下牠不久，David便帶牠參賽，贏了個「3-6個月幼犬美態獎」。「攞咗獎就心雄，希望可以再繁殖到優質品種參賽。」但Gordon性格好勇，又愛撩事鬥非，不時將全屋的衫褲及水喉咬爛。於是「把心一橫」，索性帶牠投考警犬，讓專人好好栽培和訓練牠。
David喜歡狼狗，是因牠夠英夠威嚴，為了「愛狼」，仍是小學生的他，在家人反對下斗膽在公屋養狼狗！結果養不到一星期，就被迫將平生第一頭愛犬Alan，帶到外婆上水的家寄養。每逢假期，David必往探望。如是者養到Alan兩歲，某天回家竟收到外婆傳來的噩耗：「Alan喺馬路俾車車死！」愛狗如命的David，足足喊了成個星期！長大後，David為了養狼狗而搬進村屋。兩年前更索性與家人分居，搬到更偏遠的村落。現共養有7頭狼狗，1頭史納莎及2隻狐狸㹴。
狼狗可說是狗巿場上最值錢，名種靚狗可以百萬計，三個月大的初生狼狗亦可賣過萬！只是近年狼狗巿場一樣玩北上，香港的狼狗BB才跌價至一、二千都有交易。
當廚師的David，雖然工作時間長，但也不怕狗女們出外拈花惹草，「狼狗唔似唐狗咁擺晒尾。狗公都心急，但狗女會發爛渣，好多時都要我哋㩒住先搞得成。」
狼狗女約半年來潮一次，由第1日有血水出計起，約第9-12日交配成功率最高。懷孕期約60-70日。主人可帶狗女到狗場交配，與不出名的狗隻交配約收$3,000，名種狗就要成萬。
狼狗最愛食生牛肉，這樣才會眼夠神、有火氣，肌肉線條亦好重要，故最好可以訓練牠們跑草皮。有些玩得專門的人會將狼狗困在一個細籠，到參賽時才放出來，那就會有一股威猛火氣。但David不忍，加上沒時間進行訓練，都由得牠們自然成長。