噚日上晝喺運輸署幸運車牌拍賣會上，八方見到有線十八台賽馬節目主持珊翠絲都嚟趁熱鬧，原來今次係佢第一次嚟，佢話純粹係想見識下，冇乜心水車牌。不過，雖然佢空手而回，但可能帶挈其他人發小財。
拍賣會完咗上半場後，八方當然想趁機問珊翠絲攞貼士，點知俾在場一個保安員捷足先登，珊翠絲即刻介紹噚日第七場五號大熱門馬「時代巨星」。結果隻馬真係跑第一，獨贏每十蚊派三十七元半，都算唔錯，唔知個位保安員有冇真係去馬？
噚日係跑馬日，雖然珊翠絲對拍賣車牌好有興趣，但都唔可以睇埋下晝嗰場，佢重好坦白咁同記者講：「想詐病（唔返工）都唔得啦，都俾你哋影咗相！」
珊翠絲冇睇埋下半場真走寶，因為下晝有一個可轉讓嘅普通車牌KL168（底價只係一千蚊），由一位神秘男子以十一萬八千蚊擊敗兩個對手投得，成交價係底價一百一十八倍！情況係近嚟罕見，佢重以十萬蚊投得KL28㖭。
傳真︰2623-9278
電郵︰