無綫台慶後日舉行，今年「我最喜愛的飛躍進步男藝員」競爭激烈，當紮新人林峯與陳豪叮噹馬頭。前晚，利太默認林峯契仔身份，並大讚他演技出色，更暗踩林峯勁敵陳豪嘴歪歪，出口術為林峯造勢。
無綫當紮新人林峯，入行至今被盛傳是無綫董事利孝和夫人的契仔，林峯對此一直否認。利孝和夫人前晚出席位於銅鑼灣的「希慎道原野夢幻之旅」周年派對。
談到利太契仔林峯憑《流金歲月》角逐「飛躍進步男藝員」獎，她默認林峯契仔身份之餘，更即時大讚：「好，佢做得好好，我不知幾憎佢，我咁憎一個人，就證明佢演得幾出色啦！」另一對手陳豪呼聲亦高，她聞言說：「邊個陳豪？」記者解畫指對方演《洛神》，利太說：「哦！嘴歪歪嗰個，好似做醫生㗎嘛。（指《妙手仁心II》）」
利太隨即將焦點轉回《流金歲月》，她說：「嗰個儍妹茵茵（胡杏兒飾）都做得好好，不過我唔認得佢乜名。我哋個台藝員太多，好亂，記唔晒！」
此外，何超瓊、霍啟剛女友盧恬兒、Rosemary男友Gordan亦有出席，李桂蘭更戴上頸箍，她表示因早前不慎受傷，壓到神經線致舊患發作，前晚活動後再返醫院。 採訪：梁錦雯 攝影：陳慧安