啱啱喺月頭嚟過香港嘅V6，未開騷之前曾經話過準備今次個唱唔使一個禮拜，我羅拉當時就覺得佢哋好大口氣，後來先知V6返到日本原來連雜耍都要撈埋，重要真係喺山梨縣KIGURENewCircus馬戲團表演，真係搵命博㗎！難怪佢哋開concert當食生菜囉！
前兩日日本嘅電視台終於播出V6嘅表演，我羅拉梗係第一時間擔櫈仔睇啦，除咗咁啱落選而幸免於難嘅井之原快彥之外，其餘五位成員每個都要表演一個項目：森田剛搵四張木櫈叠埋玩倒立；三宅健喺七米高空行鋼線；坂本昌行徒手爬上十五米高嘅長繩玩花式；至於長野博就化身馴象師，佢着住件筋肉人衫，認真難頂！不過最危險嘅一定係玩空中飛人嘅岡田准一，隨時連命都冇！
聽講佢哋集訓咗個半月，其間坂本昌行練到大腿內側出血，岡田准一重扭傷手筋㖭，睇見佢哋表演嗰陣面色蒼白兼成身冷汗，都不禁要講句抵佢哋咁紅嘅！