有「哈佛小甜甜」之稱的任葆琳，認為靚的標準是健康加上自信，而閱讀增加內涵可提升自信，她透過書本，可認識不同年代、地方的衣着文化，對個人穿衣風格極有幫助。
有「哈佛小甜甜」之稱的任葆琳（Pauline），對穿衣扮靚有一套哲理，她說：「我覺得靚嘅標準係要健康加信心，平時做幾多facial同mask都好，都唔及身體健康顯得活力十足。而且自信心都好重要，所以蜜運中、俾人追嘅女仔一定係最靚、最sharp，因為呢個時期，女仔對自己最充滿信心。」
Pauline續說：「內涵可以提升自信，所以我好鍾意睇書，科幻小說、歷史故事、風土人情咁，增廣見聞之外，有時書本內容會提到唔同年代、地方嘅衣着文化，直接、間接都對個人衣着風格有幫助。」
至於穿衣之道，Pauline表示不是「貪靚之人」，但愛花心思裝扮，她說：「你要清楚了解自己身體、樣貌同氣質，唔襯就唔好強求。重有我耐唔耐就搵啲舊相出嚟，睇吓三、五年前嘅自己，就知邊個style啱你多啲。」
此外，Pauline在購物前亦會做足功課，她說：「我多數喺香港買衫，方便之餘又有discount。去外地購物，出門前一定做足資料搜集，一到埗就會捐窿捐罅去搵，快捷妥當。」而現正播映的《法內情2002》，是Pauline首次參演的電視劇，她在戲中扮演一位女檢控官，拍攝時她還出動六位數字的私伙服裝。
對此Pauline說：「除咗第一次出場嗰副眼鏡之外，其他都係我自己嘅私伙，加加埋埋都成六位數字，不過冇所謂啦，做專業人員服裝梗係要又靚又醒，着自己嘅衫舒服又啱身，拍出嚟效果好啲，合乎經濟效益。」
今次任葆琳示範的澳洲品牌EastonPearson，是由兩位女性設計師PamelaEaston及LydiaPearson創立，走華麗而低調的民族風格，以米、白、黑等色調為主，並運用大量貝殼、銅片和銀釦等作details，以及如汽車等圖案，洋溢浪漫的現代氣息。
任葆琳對此品牌亦愛不釋手，她說：「我好鍾意民族風格，呢個品牌嘅衫型得嚟又girlish，同我性格好襯，而且好多details，好似人手做咁，感覺幾矜貴。」
採訪：JessicaNgan
攝影：RickyChan
髮型：Headquarters
服裝：EastonPearson（LaneCrawford）
場地：中環連卡佛