近日忙住宣傳新片《赤裸特工》嘅MaggieQ，前晚難得有時間同老友陳小韻、何超儀、陳子聰敍舊，佢哋約咗喺中環蘭桂坊嘅五十年代餐廳晚飯。
前晚大約十點幾，MaggieQ着住件紅色低胸裝同白色低腰褲，鬼死咁惹火喺蘭桂坊出現，由於星期五晚蘭桂坊人頭湧湧，MaggieQ嘅出現自然吸引唔少外籍人士嘅目光，但佢一於少理，掂行掂過，最後重一支箭咁走入去五十年代餐廳。
MaggieQ原本約咗班老友十點食飯，但結果佢等到成十一點半，陳小韻、何超儀同陳子聰先至蒲頭，坐到MaggieQ呆呆滯滯。好彩MaggieQ冇因為等咁耐而發脾氣，佢同超儀佢哋一邊食飯一邊傾偈，傾到凌晨一點幾先至捨得走人。
黃凱芹噚日喺沙田新城市廣場舉行「加州紅難忘記黃凱芹簽名會」，唱片公司高層陳少寶特登去頒金唱片獎座畀佢。黃凱芹聽日四十一歲生日，老友湯寶如（左）亦出席幫佢預祝，重一齊切蛋糕，而且有過百位歌迷排隊攞簽名，場面都幾墟冚。黃凱芹即將舉行嘅個唱，佢話一定唔敢學許志安咁着T-back內褲喎。
陳慧琳（Kelly）日前去大馬，為下月舉行嘅演唱會宣傳。Kelly話佢嘅演唱會會比香港嘅精采，今次除咗會搵埋細佬陳司翰做表演嘉賓，兩姊弟一齊合唱外，Kelly重話會整蠱吓一向斯斯文文嘅細佬㖭。Kelly話對自己今年喺樂壇嘅成績好滿意，佢話：「出唱片，開演唱會，而且重攞咗十大傑出青年獎，我唔覺得有乜嘢遺憾！」
張文慈早排去咗美國大西洋城登台，佢一到埗諗住換美金用，喺找換店換錢時，因為拎住好多行李唔方便，咪將行李放低再換錢，點知有個滿身酒氣嘅外國人鬧佢冇排隊，張文慈道歉之後，對方竟愈鬧愈起勁，搞到佢火都嚟埋，佢擺出一個打泰拳嘅姿勢迎戰，佢個助手見勢色唔對，就即刻出嚟勸交。