孫9招對地產股續有刺激，加上美股升，恒指再升124點。滙豐（005）隔晚喺倫敦同紐約因為收購Household，散到變形，只係有少少虛驚，港市最低84.75元，高收86.75元，應酬吓番鬼佬少少，唔見1元。
滙豐前日收市後宣布收購Household，好多即時嘅評論係買一檔問題生意，乜乜攤薄每股盈利等等。老實講，見到股價散落嚟，好易評論啫。見淡話淡，見股價跌低，梗係話收購不利。如果唔係有啲問題，點會買到平嘢，Household若然平穩，又或者美國經濟冇乜事，滙豐呢鋪有可能好似當年收購美國海豐銀行咁，最後證明對集團有利。滙豐PE19倍，高PE收購低PE股份，應該唔會有每股盈利攤薄效應。
滙豐Call輪，咪睇得太淡，有平平哋之時，應該執番些少。兩隻對象係9395同9404，等機會跌些少買入。
昨日散得最勁嘅滙豐Call輪9159，收1.2仙，唔見70%，有幾萬銀成交。
隻輪重有幾日就冇得買賣，溢價3.9%，槓桿率723倍。行使價90元，正股做86.75元，升上90元機會極細，有9159者，要打定輸數。就算睇滙豐有反彈，呢件都咪郁手。
章盛