新人王嘉明（光頭仔）、陳冠希同九人女子組合Cookies合作拍嘅新戲《九個女仔一隻鬼》會喺下個禮拜六（二十三日）上映。
光頭仔因為拍戲嘅關係，日久生情，佢對Theresa好有好感。
之前Theresa因為扁桃腺發炎入咗醫院，光頭仔就大獻殷勤日日去探佢，於是佢哋嘅緋聞就傳到開晒巷。講開又講，光頭仔同Theresa喺戲裏邊都係咁啱飾演情侶，話說光頭仔本來係一個口齒唔伶俐嘅男仔，又缺乏自信，好想追Theresa又唔敢追，結果佢因為得到戲裏面做佢妹妹嘅Stephy鼓勵，終於鼓起勇氣追求Theresa，最後當然贏得美人歸啦！
光頭仔拍戲嗰陣，重捉住Theresa隻手談情，拍呢場戲嗰時，佢重好鬼投入，唔知俾佢捉實隻手仔嘅Theresa又有冇過電呢？
台灣女星天心日前喺台灣為模特兒大賽擔任嘉賓，佢得到大會安排着咗套好靚嘅裙出場，大騷修長美腿，性感誘人。
問到天心護腿嘅心得，佢用國語話：「我從小就養成絕不久坐，當腿部痠痛時，我會先蹲下三分鐘紓緩一下才坐下。平時我習慣早睡早起，多喝開水和多吃水果，這些對身體很有益。」大家如果想好似天心對腳咁靚，都可以試吓佢提供嘅方法。
謝霆鋒串謀妨礙司法公正罪成，本來被判履行社會服務令二百四十小時，但單案要司法覆核，結果會點，下星期一就知道。霆鋒連日嚟都留喺裕景花園嘅寓所，噚日下晝霆鋒老竇謝賢個司機載住工人帶啲食物畀霆鋒，之後，就見到霆鋒阿媽拉姑架保母車，估計係去探個仔。拉姑日前重為咗個仔單案專程去泰國拜四面佛，祈求神靈庇佑。
陳淑蘭、苑瓊丹噚日喺九龍塘出席「藝壇雙節棍之今日女性不再是弱者」記者招待會。佢哋話喺下個月有個表演，會着代表唔同年代女性嘅服裝，但係蘭子就話自己一定唔會着T-back，因為佢之前都試過着，但係就好唔習慣。而苑仔話佢哋上次露胸同露股冇貶低女性嘅成份，佢只係散發女性嘅外在美。
吳啟華新女友羅泳嫻噚日喺尖沙嘴出席《歡樂滿東華2002》記者會，佢會喺東華參加「卡拉之星」，如果籌得最多錢嗰個藝員就可以喺節目度唱首歌娛賓。問羅泳嫻佢個男友吳啟華會唔會贊助佢？佢就話男友根本唔知佢籌款，不過吳啟華都讚過佢唱歌好聽喎。問到戀情公開咗會唔會有壓力？佢話：「平常心啦，最初我都擔心㗎，點知大家對我都好好。」