都市情侶拍拖節目，來來去去不過是行街、睇戲、食飯、唱K，但到了周末，如果仍然重複上述指定動作，女朋友仔一定會詐晒型。花樣多多的Henry就醒目得多，趁住難得的星期天，開番部型仔開篷小跑車，沿三號幹線直踩入天水圍，先到候鳥勝地尖鼻嘴欣賞大自然美景，接着再在不遠處的觀鳥軒自養蜂場，親自採摘各種合時蔬果餵飽肚仔，最後去埋水澤田園，一次過玩齊釣魚及水上單車等玩意，哄得女朋友Irene不知幾開心，各位男士們學嘢啦！
記者：尹珊珊攝影：楊錦文
Model：Henry、Irene（FromSunSpot）
車輛提供：靈獅汽車（28663000）
標緻206CC自在港推出後，一直備受年輕車迷追捧，皆因佢擁有流線型嘅車身外，開關容易嘅電摺硬頂，亦能讓用家盡享開篷駕駛樂！最近，代理為吸引買家，特別為206CC加裝一套，由著名改裝公司Esquiss'Auto所提供嘅包圍套件，除令造型增添一份跑味外，更以限量形式發售！車廂設備齊全易用，加上座椅擁有頗高承托力，令用家坐得舒適；無論係1.6公升（自動波）抑或係2.0公升（手波）引擎，都擁有強勁動力輸出，從而令性能表現更突出！
標緻206CCSport特別版(1.6)小檔案
引擎：1587cc直4DOHC
馬力：110ps/5750rpm
扭力：15.2kgm/4000rpm
尺碼：3835×1673×1373mm
軸距：2442mm
新車售價：$173,000（纖維座椅版）$183,000（真皮座椅版）
第1站
趁住難得的星期天，Henry特意早起，駕着心愛的型仔小跑車，由女友Irene灣仔家中出發，經西隧直上三號幹線，駁入大欖隧道後，由元朗方向駛上元朗公路直入天水圍，不消50分鐘便可依指示到達流浮山，最後再從迴旋處轉入深灣路，便順利到達行程第一個目的地──尖鼻嘴。Henry早聞毗連邊境的尖鼻嘴，向來是候鳥棲息的地方，故早已帶定一具望遠鏡，把車泊在路側後，同女友仔靜靜地賞鳥兼談心，之後再拖埋手仔沿途漫步田園，順勢約定夏天一齊重遊舊地，到附近的蝴蝶谷睇蝴蝶，自然哄得女朋友眉開眼笑啦！
別以為尖鼻嘴位置偏僻，人影都唔多隻，其實每逢假日都會有唔少市民，特登山長水遠來這兒觀鳥，採訪當日便遇到常客張先生：「平日有時間就會同朋友駕車來睇雀，有時自己一個人無聊起來，都會嚟呢度打個轉，欣賞吓大自然美景。」張生重話每逢夏季有好多人專程來睇蝴蝶㖭！
第2站
在尖鼻嘴逗留約1小時後，Henry將車子沿深灣路往回駛，途經一個名為觀鳥軒自養蜂場的地方，於是決定同Irene落車一探究竟，卻意外地給他們發現，這個全港最大的蜂場原來別有洞天！根據負責人鄧先生介紹，整個蜂場佔地15萬平方呎，除了部份地方闢作飼養美國、意大利混種蜜蜂的蜂場外，其餘土地均規劃成大自然公園，包括種滿有機蔬菜的自家農莊、養飼了過百條日本錦鯉的魚池、設有攤位遊戲的玩樂區，以及售賣有機生果及簡單小食的露天茶座等。小兩口參觀完蜂場的設施後，隨後更在這兒享用一頓營養十足的生果午餐醫肚。
地址：元朗流浮山深灣路尖鼻嘴
電話：24726962
開放時間：星期六、日上午8時至晚上7時，平日可致電預約。
泊車：養蜂場設有免費車位。
第3站
精力旺盛的Henry和Irene，在養蜂場玩了半天後仍未夠喉，跟着便驅車由深灣路出天水圍，再由流浮山道轉入天華路，途經沙江圍路口直轉入水澤田園，以15分鐘車程到達行程最後一站。前身是綠田園的水澤田園，剛於6月轉手，保留了過去集教育和康樂於一身的營運宗旨，更加插了不少新設施，例如面積有數萬平方呎的荷花池、按摩足部的蔭棚健康走廊、教授製作農莊飲品和甜品的親子園地等，不過Henry就專程帶Irene來玩鴨仔水上單車同釣魚，話要營造浪漫氣氛喎！
地址：元朗天水圍沙江圍側
電話：24726848
開放時間：上午9時至晚上12時
泊車：水澤田園門口備有大量免費露天車位。
深灣路曲折多彎位
由流浮山直入尖鼻嘴，必經深灣路，只要沿路牌指示並不難找，惟此路屬單線雙程行車，彎位特多又狹窄，駕駛時需要留意路面交通清況，遇上迎面有車輛便需往避車處讓路，故車速維持40咪至50咪就最安全。