由公布到發售，《龍之戰士V》都打正旗號話要大革新，由當年超任嘅鄉村風味，到今日PS2嘅科幻化，都恍如隨機能進化而演變，到底首次踏足PS2嘅《龍之戰士V》，除畫面質素大幅提升外，其他重大改變會否令人有脫胎換骨之感呢？
記者：徐影龍
鳴謝：CAPCOM(HK)
遊戲一開始，已經要玩家喺電腦上輸入名稱，開宗明義玩科幻Feel。到進入遊戲後，建築物及人物裝備都好有時代感，風格上跟傳統嘅《龍之戰士》可謂完全不同。
今集亦係首度全3D化，人物背景統統以多邊形製作，不過如城市般嘅移動地區，視點屬固定式，當一進入迷宮後，就可自由轉換視點，對於搜括敵人及寶物相當有用。有別過往，今集將不設任何旅館及SavePoint，要回復HP，只有靠道具補充，儲存進度，必須於電話亭中使用道具「記憶代幣」，情況同《BioHazard》嘅打字機用色帶儲存一樣，並非無限任Save。
戰鬥方面亦係破天荒採用怪物蒲頭制，即係迷宮入面企晒一隻二隻怪物，跟其相遇先可戰鬥，有別以往隨機相遇形式。當你主動接觸敵人時，己方可額外獲得一個「EXTurn」，利用呢個回合先發制人。進入戰鬥後，就會發現另一新加入嘅重要系統APS，簡單而言即係行動數值，一個回合內做到幾多嘢，完全靠AP值多少而定，包括攻擊敵人、使用魔法、移動等，不過使用道具則不在此限，呢點就同《前線任務》戰鬥系統相似。
埋身交鋒時，除可選擇一般攻擊外，若AP值允許，重可即場接駁其他招式，組成強力必殺技，而且每吓連技都會提升10%攻擊力，對付首領級敵人尤其重要。值得一提係主角阿龍在獲得「橫．一文字」技能後，可結合一開始已有嘅「縱．一文字」組成強力隱藏技「十字劍攻擊」，其他角色亦有類似組合技。
由於今集遊戲系統大幅更改，玩家需要花時間習慣之餘，初期補給物資亦唔算充裕，所以好易出現GameOver情況，不過玩家唔使氣餒，因為遊戲設有一個名為「SOL」嘅系統，當玩家GameOver後，便可選擇重玩，之後就有機會遇到額外劇情，通常係一啲輔助情節，令玩家更明白故事方向，如故事剛開始接任務時，就已經出現第一個SOL，畫面重會標明SOL及手掣會震。不過因GameOver而引發SOL，部份能力值、金錢及道具均會作某程度縮減。
就算你咁叻過關斬將唔會GameOver，都可以喺Menu度選擇「GiveUp」，自動進入SOL狀態，主動咁搵隱藏劇情，而且重唔會扣你任何數值同道具㖭，不過就要反覆LoadGame同玩番Save之後嘅流程。
玩過《龍之戰士V》一段時間後，覺得由玩法到風格都同舊作大相逕庭，除主角叫阿龍同識變身龍之戰士外，根本上可當一隻新系列嚟玩。今集難度頗高，好易出現全滅GameOver，戰鬥則極為着重AP值及連技運用，有別其他「齋按掣戰鬥」嘅RPG，尚算可取，而賣點之一嘅SOL系統，需要反覆玩同一流程，對心急或不曉日文嘅玩家嚟講，吸引力唔算大。
今次CAPCOM特別印製咗一批《龍之戰士V》嘅大海報，隨行貨附送，香港CAPCOM更特別預留100張大海報送畀蘋果讀者。只要手持今日《蘋果日報》本版，到DreamStore就可免費獲得呢張咁靚嘅大海報，名額一百個，先到先得。順帶一提，緊接住嘅《BioHazard0》亦有100張大海報送畀讀者，詳情就要留意星期一嘅報道。
遊戲類型：RPG
對應機種：PS2
遊玩人數：1人
開發商：CAPCOM
DreamStore
地址：灣仔東方188商場256號舖
電話：25753285
(C)CAPCOMCO.,LTD.2002ALLRIGHTSRESERVED.