做咗澳門大賽車首位參加雷諾方程式女車手，心情既興奮又得意，重感覺得有啲壓力㖭。
經過連續兩日試車，喺場內經常俾唔同車隊嘅工作人員，又或者保安人員拉住影相留念，覺得自己都幾受歡迎，不過，我知人哋因為我係女車手才留意我。
我知道自己嘅賽車技術同成績都只係麻麻，只不過係女車手先至成日成為焦點，其實我嘅賽車生涯啱啱至起步，重有好多地方可以進步同改善，希望不久將來，能夠成為一個有實力又有名氣嘅女車手，唔想做花瓶。
過去參加賽事，我差不多肯定係全場最年輕車手，但今次喺澳門首次參加雷諾方程式賽車，有位年僅十五歲嘅澳門葡裔車手艾明達參賽，今勻我唔再係最細嘞。
噚日集中精神試車，所以就冇特別留意艾明達嘅表現同技術係點，只知佢同我一樣，好細個已經開始玩高卡車，之後再轉玩雷諾方程式；而我嘅教練菲臘睇過艾明達試車，就覺得佢係一個好有潛質嘅年輕車手，我就希望多啲年輕車手同場比賽，咁車壇就會更加熱鬧。
中國長城車隊車手鄧穎詩