許志安前晚在紅館開個唱，除赤裸上身露出背部紋身外，繼上次演唱會露T-back內褲後，今次他又穿着透視褲及穿窿長褲，大露底橫色誘Fans。安仔還在個唱上播出早前的「廚房宣言」及Sammi落淚片段，重提二人感情事。
許志安前晚在紅館舉行首場《許志安OnShow2002演唱會》，安仔的戰衣大膽前衞，繼上年演唱會露出T-back內褲後，前晚他分別穿上透視及穿窿長褲，特意露出深色及白色內褲，看來他十分喜愛露底橫。安仔更在台上赤裸上身，大騷畫了六小時的女性面孔紋身，展示其男性魅力。
安仔在個唱上又穿了一件十字架圖案上衣，十字架跨過褲檔。他說：「好彩有條帶遮住褲鏈，原來我冇拉拉鏈。之前開咁多演唱會，冇晒刺激，今晚要犀利啲，我係安全地大膽。」
每次安仔舉行個唱，歌迷例必大叫「Sammi」（鄭秀文），安仔忍不住說：「好心你哋啦，out晒啦，重講埋啲咁嘅名。」後來，螢幕播放了安仔首次奪「最受歡迎男歌手獎」時的「廚房宣言」及鄭秀文在台下痛哭的片段，他隨即唱《愛你》，有歌迷感動流淚，亦有歌迷大叫：「好長氣呀！」
安仔又說：「一時話我分手，一星期後又話我復合，我今日未睇報紙，唔知係咪復合咗。」最後安仔讓觀眾點唱，不少歌迷乘機點唱Sammi歌曲，安仔起初說：「咁你即係為難我啫！」但最後他亦唱了Sammi的《終身美麗》。
事後安仔接受訪問提到「廚房宣言」，他說：「係呀，好感動，始終係我第一次。」問到說Sammi好out是否意指二人感情已逝？安仔說：「唔好講呢啲啦，我係話觀眾成日喺演唱會嗌佢個名，out咗咋。」問到Sammi會否捧場，安仔說：「睇佢有冇時間啦。」
前晚當安仔與歌迷握手時，險些跌倒，幸沒有受傷。另外，除安仔父親到場支持外，其好友梅艷芳及蘇永康等亦有捧場，鄧健泓則擔任表演嘉賓。
採訪：王連連 攝影：陳偉權