全港機迷引頸以待嘅CAPCOM大作《BioHazard0》，本來11月21日先推出，不過鐵人收到風，今日下午將會喺各大Game場出現，買行貨有Poster隨遊戲附送，重有機會得到連日本都冇嘅限量版T-shirt，售價大約係$499左右，其實行貨同水貨內容一模一樣，重有嘢送，點揀？你話嘞！
好多廠商唔知係咪驚《BioHazard0》走勢強橫，紛紛將啲遊戲嘅售價降低，近排有部份GC遊戲好似Koei嘅《Battle封神》等，跌到落兩百蚊有找嘅水平，而Konami嘅《足球小將》就$300有找，有興趣不妨順手買埋。
前陣子GC隻《OnePiece》叫好又叫座，連帶之前PS同WSC隻《OnePiece》都多咗人返貨。昨日推出嘅GBA《OnePiece》由於冇乜人返貨關係，相信冇$350都唔得，想買嘅人要留意。一直以來係小朋友至愛嘅寵物小精靈《Pokemon》，就會喺21號推出，雖然有行貨，但相信都離唔開$300左右。至於GBA嘅《魂斗羅》已經見街，現價約$250左右。
同樣係手提機，靜咗一排嘅WonderSwan主機SwanCrystal，前幾日就出咗兩款新顏色，分別係透明藍同透明黑，市價約$460左右，賣相都唔錯㗎。
前排提過連MGS2嘅製作人都激讚嘅XBOX《SplinterCell》，應該會喺呢幾日推出，下星期五22日就係XBOX行貨推出嘅大日子，如果你諗住買機，搭機買呢隻勁Game相信都冇走雞嘞！