年長一輩永遠愛講舊時，就好似讀者芳姐一樣，煮餸都不忘緬懷童年，今次所煮的兩款菜式，便是芳姐童年時的至愛家鄉菜之一，「細個時住喺中山，屋企無錢，好多時都要豉油撈飯，呢兩味餸就係嗰時爸爸出咗糧有錢先至有得食嘅。」雖然現在的芳姐仔大女大，毋須再為三餐而煩惱，但對於呢兩味餸仍然回味無窮，價錢又超實惠，難怪全屋人特別是老公招先生都話：餐餐食都唔厭！
記者：區佩嫦
攝影：林栢鈞
籍貫中山的芳姐，經常都會炮製家鄉小菜畀屋企人歎，好似呢款蜆肉生菜包就係細個時喺家鄉時經常食到嘅菜式之一。「中山的蜆仔肉較潮州嘅蜆肉更加細粒，好多時都會用嚟炒，或者用嚟煲粥都好好味。不過記得細個時要將蜆肉逐粒逐粒去殼，嗰時無錢有得食就已經好開心嘞，唔理要逐粒逐粒去殼有幾麻煩，好彩𠵱家街市賣嘅蜆肉多數已去殼，夠晒方便。」
屋企人之中，最欣賞呢款菜式嘅當然係芳姐嘅老公招先生，招先生話：「食咗咁多年都唔厭，每次食都覺得好好味，用嚟送酒或送飯都咁啱。」梗係啦，小記見芳姐每次都將蜆肉用生菜包好，然後放在招生的嘴邊，咁多年夫妻都可以咁甜蜜，換轉係我畀乜我食都覺得好食啦！
材料
蜆仔肉8両 $8
韭菜4両 $2
銀芽4両 $4
唐生菜4棵 $2
蒜茸半茶匙
薑片數片
紅椒1隻
芳姐醒兩招：銀芽唔黑遲落鹽
想銀芽白雪雪唔變黑的話，最好待銀芽全熟臨上碟先至好加鹽，咁樣啲銀芽就唔會黑啦！
每次炮製呢味蒸肉餅，芳姐就會諗番起細個時同兄弟姊妹喺窗口望住爸爸返屋企的情景。「細個時屋企好窮，通常每日都係豉油撈飯，若果喺窗口見到爸爸攞住嚿豬肉返屋企的話，全屋人都會即刻分工合作洗米煮飯同炒白豆。雖然𠵱家有豬肉食唔係乜嘢一回事，但每次食時都會覺得好開心，好彩連我啲仔女都好鍾意食，間中就叫我煮畀佢哋食。」
材料
白豆4両 $1
免治豬肉8両 $8
葱花 少許
調味料
鹽 3/4茶匙
糖 1/4茶匙
生粉 3茶匙
生抽 1茶匙
水 適量
芳姐醒兩招：醃豬肉加水
有冇覺得蒸豬肉餅時啲肉餅好硬呢？不妨在醃豬肉時加少少水，咁樣啲肉餅先會鬆化，至於加幾多水就要邊加水邊用筷子攪動，直至覺得豬肉夠鬆軟就得。