香港中央圖書館噚日有一個名為「詩影澄懷」嘅攝影展開幕，大教授張五常話「勢必洋洋大觀」，囑八方一定要去捧場，欣賞黃貴權醫生之大作。八方去到，人山人海，除咗大教授，重見到邵逸夫爵士、方逸華、霍朱玲玲、鄔維庸、楊尚昆個公子楊紹明……猛人如雲。
九次入選世界十傑的黃貴權大師，本身係內科醫生。方小姐同八方講，黃貴權既係六叔嘅醫生，亦係佢嘅好友。開幕禮前，黃醫生一見相識三十載的六叔，即刻好興奮咁大讚六叔身體好，重話「希望有機會教佢影相，兩個人孭住相機周圍走，重健康呀！」
何解醫生鍾意影相？曾經喺瑪麗醫院同伊利沙伯醫院行醫，七一年起私人執業嘅黃醫生解釋，齋做醫生好悶，所以先後鍾情中國畫同攝影，同大自然接觸，追求「物我相忘」嘅寧靜意境。噚日重有好多知名攝影發燒友到場，幫鄧小平同好多中央領導影過人像嘅楊紹明，更當正自己係攝記，一見到六叔同黃醫生碰面嘅場面，即刻撲埋去大影特影。
傳真︰2623-9278
電郵︰