馬主N請馬主H參加馬主協會晚會，此乃馬圈盛事之一，要「黑呔」（blacktie）出場，唔着晚禮服嘅，唔係幾好意思噃。但香港係自由社會，好多人唔慣着禮服，一於各取所需，譬如葉楚航就着套淺灰色西裝到場（唔通深色西裝都冇？當然唔係啦，最近佢馬房贏一個孖寶，富高搭寶樹神駒，十四倍乘四十九倍噃），淺灰色混雜在黑色「制服」叢中，特別搶眼。
是晚表演歌星名LiLaiHa，冇人知道佢係邊個，唱功都算幾好啦。現場搞氣氛，搵名人上台唱歌，馬主協會主席衞志良與電盈副主席張永霖，立法會秘書長馮載祥係中小學同學，由細玩到大，又係港大校友，佢兩位當然俾衞主席「出賣」咗啦，「青樓名妓」上台唱一支RayPeterson嘅TellLauraILoveHer，有板有眼，不愧為卡拉OK歌王；至於馮載祥，素稱歌王，唱一首貓王嘅BlueSuedeShoes，夠cool夠勁，夏佳理夫人都為之郁膊頭。
最估唔到嘅係馬會新科董事周永健律師竟然唱難度好高嘅NewYork,NewYork，佢嘅英文從來都係字正腔圓，唱《紐約，紐約》，咬字清晰，聲底雄厚，運氣自如，肯定係學過師嘅，佢位太座Susan（和黃集團副董事總經理）相信在家耳福不淺，叫老公唱歌，親切過聽CD。第四位上台嘅係馬會粵曲王陳祖澤，陳董事喺馬會學唱粵曲好耐，此晚與LiLaiHa合唱《獅子山下》，雖冇唱粵曲咁好聽，都聽到佢嘅功力不淺。