章小蕙積極計劃在內地開時裝店，她聲稱多次被人博懵，借開舖之名找她陪吃飯。她昨日在中環店內表示想出防狼法，就是先收六位數字「誠意金」才露面，虧她想得出。
章小蕙昨日在中環時裝店內整理新裝，她透露在內地開時裝店的計劃將於明年秋天可望實現。雖然現時不少國際品牌均相繼在內地開舖，但由於她缺乏後台和資金，進軍內地時裝界困難重重。
章小蕙在尋找投資者合作的過程中驚險萬分，不時遇上博懵之徒，她說：「內地經常有人博我懵，我試過好多次，啲人借住同我合作開舖、傾生意為名，其實就係想識我，咁樣就連中間人嘅介紹費都慳番。次次搵我食飯、飲茶，原來全部都係渾水摸魚，完全冇心同我合作做生意，我撞過幾次板啦。」
章小蕙續說：「最近有個律師朋友提醒我，我已經開始實行新system，就係邊個要同我傾生意，唔該佢放低『誠意金』先，合作得成就會退還筆誠意金，否則就沒收。」
問章小蕙訂立的誠意金數目是多少？她說：「雖然我重未正式收過，不過我諗至少都要六位數字（十萬元起）啦，筆誠意金會放喺律師樓度，咁樣保障大家啫。你諗吓喎，其實我都好危險，要保護自己嘛。我上去（內地）一滴酒都唔會飲㗎，因為好多人醉翁之意不在酒。」
章小蕙又賣花讚花香地大讚誠意金這招比防狼器更有效。如果行得通，章小蕙豈非太好賺。